Rruga drejt “Prishtina 2030”: Kryeministri Kurti harmonizon hapat me ekspertët francezë të sportit

Kryeministri i vendit, Albin Kurti, ka pasur një takim pune me delegacionin e lartë nga Franca, të kryesuar nga ambasadori francez për Sportin, Damien Combredet-Blassel, ambasadori i Francës në Kosovë, Jean-François Huchet, si dhe zyrtarë të përfshirë në organizimin e Lojërave Olimpike “Paris 2024” dhe përfaqësues të “France Sport Expertise”. Në fokus të bisedës kanë qenë fazat përgatitore për mikpritjen e Lojërave Mesdhetare “Prishtina 2030”, ku është vënë theksi te ndërtimi i infrastrukturës, skemat e financimit, mbarëvajtja e prokurimit dhe modelet e menaxhimit të këtij organizimi madhështor. Duke vlerësuar mbështetjen e shtetit francez, kreu i ekzekutivit ka bërë të ditur se Parisi mbetet një aleat kyç për suksesin e këtij eventi, duke përmendur gjithashtu bashkëpunimin e konkretizuar përmes marrëveshjes së kredisë me Agjencinë Franceze për Zhvillim (AFD) dhe Deklaratën e Synimit për ngritjen e komitetit të përbashkët.