Tragjedi në Shkodër: Elektricisti 34-vjeçar humb jetën nga korrenti teksa riparonte një defekt

Një tragjedi e rëndë ka tronditur mbrëmjen e sotme fshatin Bardhaj të Shkodrës, ku një elektricist 34-vjeçar ka ndërruar jetë si pasojë e goditjes nga rryma elektrike, ndërsa po përpiqej të ndreqte një defekt në rrjet. Sipas të dhënave paraprake nga strukturat policore, i riu ishte thirrur privatisht nga disa banorë të zonës jashtë orarit zyrtar të punës, për të rikthyer dritat në banesat e tyre. Megjithatë, ndërhyrja është kryer pa njoftuar paraprakisht dispeçerinë e Operatorit të Shpërndarjes së Energjisë Elektrike (OSHEE). Pas aksidentit tragjik, 34-vjeçari u transportua me urgjencë drejt Spitalit Rajonal të Shkodrës, por fatkeqësisht mbërriti atje pa shenja jete. Ndërkohë, autoritetet kompetente kanë ngritur grupin hetimor për të zbardhur plotësisht dinamikën e ngjarjes. Në njoftimin zyrtar të Policisë thuhet: “Shkodër / Informacion paraprak. Rreth orës 20:36, në Urgjencën e Spitalit Rajonal Shkodër është dërguar pa shenja jete shtetasi A. N., 34 vjeç, me detyrë elektricist i zonës. Nga të dhënat paraprake dyshohet se 34-vjeçari ka rënë në kontakt me rrymën elektrike, gjatë kohës që po kryente riparimin e një defekti në një shtyllë elektrike, pasi ai ishte thirrur jashtë orarit të punës nga disa familje, të cilat kishin mungesë të energjisë elektrike, në fshatin Bardhaj, por pa njoftuar dispeçerinë e OSHEE-së. Grupi hetimor ndodhet në vendngjarje dhe, nën drejtimin e Prokurorisë, vijon punën për sqarimin e plotë të rrethanave dhe dokumentimin ligjor të rastit”.