Debati për foton e Rugovës në Presidencë, ligjvënësi i LVV-së i drejton pyetje të fortë Gazmend Muhaxherit

Deputeti i Lëvizjes Vetëvendosje, Armend Baloku, ka marrë pjesë në diskutimin publik që është ngritur së fundmi rreth zhvendosjes së portretit të presidentit historik Ibrahim Rugova nga vendndodhja e tij e dikurshme brenda Presidencës së Kosovës. Baloku ka theksuar se imazhi i Rugovës nuk është hequr dhe se, në vlerësimin e tij, nuk ekzistojnë rrethana apo synime nga askush për ta ndërmarrë një hap të tillë. Ai ka vlerësuar se kjo çështje është tejkaluar që prej shumë vitesh, duke shtuar se në Kuvendin e Kosovës nuk shfaqet më ai radikalizëm që do të mund të nxiste dikë të konsideronte largimin e fotografisë së ish-presidentit. Sipas ligjvënësit të LVV-së, shumica dërrmuese e gjeneratave të reja të deputetëve dëshmojnë respekt të lartë ndaj figurës dhe kontributit historik të Ibrahim Rugovës. Megjithatë, Baloku ka shfrytëzuar këtë mundësi për t'i drejtuar një pyetje publike nënkryetarit të LDK-së, Gazmend Muhaxheri, në lidhje me qëndrimet e tij të kaluara ndaj figurës së Rugovës. “A e ka ndryshuar mendimin për Presidentin Ibrahim Rugova, apo vazhdon të jetë i bindur se ai nuk e meritonte të ishte president?”, ka pyetur Baloku. Ai ka kujtuar se Muhaxheri, gjatë periudhës kur ushtronte mandatin e deputetit, kishte abstenuar apo nuk e kishte votuar Ibrahim Rugovën për postin e kryetarit të shtetit. “Ndoshta foton e mban në zyrë, por për President nuk e pranonte dot. Kjo ishte fakt i bërë publik nga vetë kryetari biznesmen”, ka shkruar Baloku. Diskutimet rreth portretit të Ibrahim Rugovës në institucionin e Presidencës u riaktualizuan pasi pamjet nga takimet e fundit zyrtare treguan se fotografia e tij ishte zhvendosur nga vendi i saj tradicional ballor dhe ishte vendosur në një pozicion anësor.