Kurti takon kreun e Senatit francez në Paris: Kërkojmë mbështetjen e Francës drejt rrugës euroatlantike

Kryeministri i Republikës së Kosovës, Albin Kurti, është pritur këtë të diel në kryeqytetin francez nga presidenti i Senatit të Francës, Gérard Larcher, takim ky i zhvilluar në vigjilje të hapjes zyrtare të Forumit të Paqes në Paris. Gjatë këtij bashkëbisedimi, kreu i ekzekutivit kosovar ka shprehur falënderimet e tij të sinqerta për kontributin historik të Francës në procesin e çlirimit dhe të shpalljes së pavarësisë së Kosovës, si dhe për ndihmën e pandërprerë në zhvillimin e gjithanshëm të shtetit. Në fokus të bisedimeve kanë qenë zhvillimet politike dhe stabiliteti institucional pas konstituimit të organeve drejtuese, si dhe prioritetet e kabinetit qeveri-tar për mandatin e ri, duke veçuar investimet në projekte strategike si infrastruktura hekurudhore e sportive, ndërtimi i digave dhe fuqizimi i industrisë së mbrojtjes. Po ashtu, palët kanë shkëmbyer mendime rreth thellimit të raporteve dypalëshe, avancimit të reformave thelbësore në drejtësi, arsim dhe administratë publike, si dhe lidhur me të arriturat e vendit në fushën e demokracisë dhe zhvillimit ekonomik. Duke vënë në pah se Kosova ndjek plotësisht linjën e politikës së jashtme dhe të sigurisë të Bashkimit Evropian, Kurti ka theksuar se dhënia e statusit të vendit kandidat dhe nisja e negociatave për anëtarësim do të shërbenin si katalizator i fuqishëm për përshpejtimin e reformave dhe integrimin e vendit në BE dhe NATO.