Tragjedi në Shkodër: Elektricisti 34-vjeçar vdes nga korrenti teksa riparonte një defekt jashtë orarit

Një ngjarje tragjike ka tronditur fshatin Bardhaj të Shkodrës mbrëmjen e sotme, ku një 34-vjeçar ka ndërruar jetë pasi dyshohet se është goditur nga rryma elektrike gjatë përpjekjeve për të rregulluar një defekt në rrjet. Sipas të dhënave paraprake të autoriteteve policore, i riu, i cili shërbente si elektricist i zonës, ishte angazhuar nga disa banorë jashtë orarit zyrtar të punës për të rikthyer dritat në banesa. Ndërhyrja e tij është kryer pa njoftuar paraprakisht sallën e dispeçerisë së OSHEE-së. Pas aksidentit, 34-vjeçari u transportua me urgjencë drejt Spitalit Rajonal të Shkodrës, mirëpo mjekët vetëm mundën të konstatonin vdekjen e tij, pasi kishte mbërritur në spital pa shenja jete. Nëpërmjet një njoftimi zyrtar, Policia ka dhënë detajet e para mbi ngjarjen e rëndë: “Shkodër / Informacion paraprak. Rreth orës 20:36, në Urgjencën e Spitalit Rajonal Shkodër është dërguar pa shenja jete shtetasi A. N., 34 vjeç, me detyrë elektricist i zonës. Nga të dhënat paraprake dyshohet se 34-vjeçari ka rënë në kontakt me rrymën elektrike, gjatë kohës që po kryente riparimin e një defekti në një shtyllë elektrike, pasi ai ishte thirrur jashtë orarit të punës nga disa familje, të cilat kishin mungesë të energjisë elektrike, në fshatin Bardhaj, por pa njoftuar dispeçerinë e OSHEE-së. Grupi hetimor ndodhet në vendngjarje dhe, nën drejtimin e Prokurorisë, vijon punën për sqarimin e plotë të rrethanave dhe dokumentimin ligjor të rastit”.