Suhareka mbështet blegtorët me 63 lopë, projekti ambicioz synon mbi 100 krerë vitin e ardhshëm

Komuna e Suharekës ka ndërmarrë një hap të rëndësishëm në mbështetje të sektorit blegtoral, duke u shpërndarë 63 lopë fermerëve lokalë. Ky hap synon jo vetëm zgjerimin e tufave të bagëtive, por edhe rritjen e ndjeshme të prodhimit vendor, një nismë kjo që është mirëpritur nga vetë përfituesit për shkak të ndikimit të drejtpërdrejtë në ekonomitë e tyre familjare. Ndihma e ofruar nga pushteti lokal po vlerësohet si një mundësi e artë për zhvillimin e veprimtarisë bujqësore dhe zbutjen e sfidave financiare me të cilat ballafaqohen familjet rurale në Suharekë. “Dy i kam pasur, tash edhe një tjetër. E falënderoj komunën. Kam pasur dëshirë t’i shtoj lopët, por nuk kam pasur mundësi. I kam tre studentë në shtëpi dhe nuk kam mundur të ndaj para për studentët dhe për të blerë lopë. Synimi im është që ta rris tufën në pesë lopë”, tha Hedi Jakupi, përfitues. Një tjetër fermer, Bardhyl Zyrapi, theksoi rëndësinë e këtij subvencionimi për mbulimin e kërkesave të larta të tregut vendor për produkte qumështi. “Kjo ndihmë na ndihmon shumë. Fshati ynë ka mbi një mijë shtëpi, por ka shumë pak lopë, ndërsa kërkesa për qumësht është e madhe. Besoj se me rritjen e numrit të lopëve do të rriten edhe të ardhurat. Jemi gjashtë anëtarë të familjes dhe jetojmë nga ky biznes, duke prodhuar qumësht dhe djathë. Prandaj, synojmë ta zgjerojmë veprimtarinë tonë”, u shpreh ai. Realizimi i këtij projekti është bërë i mundur falë bashkëpunimit të ngushtë ndërmjet komunës dhe organizatës joqeveritare “Mështjerra”, e cila ka dhënë kontributin e saj në terren për zbatimin e suksesshëm të kësaj nisme. Kryetari i Komunës së Suharekës, Bali Muharremaj, ka theksuar se ky investim vjen si përgjigje ndaj shtrenjtimit të produkteve bazë dhe synon mbështetjen e pakursyer të bujqve vendas. “Kemi një marrëveshje me organizatën “Mështjerra”. Vitin e kaluar kemi dhuruar 60 krerë lopë, këtë vit do t’i ndajmë 63, ndërsa vitin e ardhshëm mbi 100. Arsyeja kryesore është edhe rritja e çmimit të qumështit dhe djathit. Qëllimi ynë është t’i ndihmojmë sa më shumë bujqit, pasi këto produkte mbeten në vendin tonë dhe konsumohen nga qytetarët tanë”, deklaroi kryetari Muharremaj. Nga ana e tij, drejtori i Bujqësisë në këtë komunë, Armend Krasniqi, ka vënë inë në nevojën e ngutshme për të ulur varësinë e vendit nga importi i produkteve blegtorale përmes politikave konkrete mbështetëse. “Duke u konsultuar me fermerët, kemi parë të domosdoshme realizimin e këtij projekti, pasi importi i qumështit dhe i mishit në Kosovë vazhdon të jetë i lartë. Projekte të tilla duhet të mbështeten si nga Qeveria, ashtu edhe nga komunat, në mënyrë që ta forcojmë këtë sektor, i cili ende nuk është mjaftueshëm i zhvilluar në Kosovë”, pohoi Krasniqi. Procesi i shpërndarjes së bagëtive do të vijojë edhe gjatë javës së ardhshme, periudhë gjatë së cilës pritet të dorëzohet kontingjenti i radhës për fermerët përfitues.