Afera e Kompleksit Partizani: Dëshmitë kyçe në gjykatë dhe prapaskenat e presionit për firmosjen e pronave

Gjyqtarja e posaçme, Elsa Ulliri, ka drejtuar seancën e radhës për çështjen e njohur si dosja 'Partizani', ku janë dëgjuar dëshmitarë kyç dhe është vënë sërish në fokus rregullorja kufizuese që pati shkaktuar përplasje mes gjykatës, avokatëve dhe mediave. Pasi avokatët i dhanë fund bojkotit disa-javor, gjyqtarja i ka falënderuar ata për praninë në sallë në nisje të procesit. Gjatë seancës, palët u njoftuan se eksperti i caktuar për çështjen do të vonohej pak, ndërsa sapo të mbërrinte do të njoftonte sekretaren me mesazh. Lidhur me këtë detaj, gjyqtarja ka bërë një koment ironik duke thënë se eksperti nuk e di që as sekretares nuk i lejohet përdorimi i telefonit në sallë. Nisja e një prej proceseve më të bujshme me këto tone tregoi qartë se, pavarësisht rikthimit të avokatëve, debati rreth rregullores së brendshme mbetet i hapur. Dëshmitarja e parë që u paraqit para trupit gjykues ishte ish-drejtoresha e Kthimit dhe Kompensimit të Pronave, Justina Boriçi. Ajo deklaroi se pas marrjes së detyrës, ish-kryeministri Sali Berisha nuk i kishte kërkuar asnjëherë ndonjë trajtim të preferuar për çështjet e pronave. Ndërkohë, ish-ministri i Mbrojtjes, Fatmir Mediu, u shpreh se pronat ushtarake përbënin pasuri kombëtare, ndonëse ambientet e Sport Klub Partizanit nuk përfshiheshin në planin e përhapjes së Forcave të Armatosura. Duke këmbëngulur në rolin e tij, Mediu theksoi se kompetencat e ministrit ishin kryesisht politike dhe jo operacionale, duke e cilësuar këtë si një çështje që i takonte strukturave ushtarake. Në dëshminë e tij, ish-komandanti i Mbështetjes Logjistike, Vladimir Qiriazi, kujtoi se në vitin 2009 ishte njohur me urdhrin e atëhershëm të ministrit të Mbrojtjes, Gazmend Oketa, i cili kërkonte firmën e tij për tjetërsimin e kompleksit Partizani. Për këtë situatë, gjenerali sqaroi se kishte informuar menjëherë shefin e Shtabit. Pas kontakteve të drejtpërdrejta me ministrin, Qiriazi tregoi se ishte vizituar nga një ekip i Drejtorisë së Antikorrupsionit, të cilët i kërkuan llogari se përse po refuzonte firmosjen. Duke parë tensionin dhe seriozitetin e situatës, ai kërkoi një takim me komandantin e Përgjithshëm, Bamir Topi. Ky i fundit, pasi nuk e priti në takim, i dha porosinë e prerë: “Vijo, zbato ligjin”.