Probleme për Francën para sfidave të nëntorit: Lëndohet mbrojtësi i Juventusit, zbulohet zëvendësuesi i tij

Kombëtarja e Francës ka marrë një lajm të papritur në prag të ndeshjeve të ardhshme në Ligën e Kombeve, pasi mbrojtësi i Juventusit, Pierre Kalulu, nuk do të mund të bashkohet me grupin për shkak dëmtimi. Futbollisti i njohur ka pësuar një lëndim në muskujt e pasmë të kofshës së majtë, gjë që ia pamundëson paraqitjen në dy përballjet e radhës që “Gjelat” i kanë për t'i zhvilluar kundër Italisë dhe Turqisë. Ky zhvillim është konfirmuar zyrtarisht të hënën nga stafi teknik i kombëtares franceze, i cili ka bërë të ditur se lojtari do të kthehet në Torino për të nisur menjëherë procesin e rikuperimit nën mbikëqyrjen e stafit mjekësor të klubit të tij. Në njoftimin e lëshuar nga federata franceze theksohet: “Pas ndeshjes së djeshme dhe pas ekzaminimeve të kryera në bashkëpunim të ngushtë me klubin e tij, Juventusin, Pierre Kalulu ka rezultuar me një dëmtim në muskujt e pasmë të kofshës së majtë. Për këtë arsye, ai largohet nga grumbullimi dhe do të qëndrojë në Torino për të vazhduar trajtimin”. Për të mbuluar këtë mungesë, stafi teknik ka vendosur të thërrasë në Kombëtaren A talentin Saël Kumbedi, për të cilin kjo është ftesa e parë në karrierë me ekipin e parë. Mbrojtësi 21-vjeçar, i cili aktivizohet me Wolfsburgun, ishte fillimisht pjesë e Përfaqësueses U21, mirëpo tani do të ketë mundësinë të dëshmojë veten nën urdhërat e trajnerit në ekipin e seniorëve. Kjo mungesë e re përbën një dhimbje koke shtesë për udhëheqjen teknike të Francës, duke pasur parasysh se në listën e të dëmtuarve figuron tashmë edhe mbrojtësi i Barcelonës, Jules Koundé, i cili gjithashtu është i paaftë për lojë.