Fatet e Ngushticës së Hormuzit në dorë të Uashingtonit: Irani pret përgjigjen e SHBA-së për marrëveshjen e re

Teherani zyrtar është në pritje të një përgjigjeje vendimtare nga Shtetet e Bashkuara të Amerikës lidhur me një propozim të ri për zhbllokimin e Ngushticës strategjike të Hormuzit. Lajmin e ka bërë të ditur Ministri i Jashtëm i Iranit, Abbas Araghchi, i cili aktualisht ndodhet në Nju Jork për të marrë pjesë në punimet e Asamblesë së Përgjithshme të OKB-së. Sipas tij, ndërmjetësit nga Katari kanë luajtur një rol kyç në përcjelljen e ideve mes dy vendeve, ndërsa tani pritet reagimi i Uashingtonit. Gjatë deklaratës së tij, kryediplomati iranian sqaroi rrugën diplomatike që po ndiqet: “Ndërmjetësit katarianë prezantuan disa ide të cilat ne i shqyrtuam. Tashmë u mbetet atyre që ta diskutojnë sërish këtë çështje me palën amerikane, e më pas vendimi përfundimtar i SHBA-së do të na komunikohet sërish përmes diplomacisë së Dohas.” Araghchi shtoi se ndërmjetësit e Katarit janë optimistë se një reagim zyrtar nga ana e administratës amerikane do të mbërrijë më së largu deri të martën. Plani i prezantuar nga Irani parashikon që Ngushtica e Hormuzit të vihet në funksion të plotë brenda një afati prej shtatë ditësh. Sipas këtij propozimi, anijet tregtare do të lundrojnë përgjatë një korridori detar që ndodhet më afër vijës bregdetare të Iranit. Në këmbim të këtij hapi, Teherani kërkon nga Shtetet e Bashkuara lirimin e disa aseteve të ngrira financiare të Iranit, shfuqizimin e sanksioneve ndaj porteve dhe eksportit të naftës iraniane, si dhe rifillimin e negociatave për marrëveshjen bërthamore. Ngushtica e Hormuzit vlerësohet si një nga arteriet më jetike për transportin global të arit të zi, çka do të thotë se çdo zhvillim në këtë zonë ka ndikim të menjëhershëm në stabilitetin e tregjeve ndërkombëtare të energjisë.