Krizë energjetike në Ukrainë: BE-ja ndërhyn me mekanizëm emergjent, njofton Zelensky

Bashkimi Evropian ka rënë dakord të vërë në lëvizje një instrument të posaçëm ndihme urgjente, me qëllim lehtësimin e gjendjes kritike në furnizimin me energji elektrike, ujë dhe ngrohje për popullsinë ukrainase. Lajmi është bërë i ditur përmes një deklarate publike nga Presidenti i Ukrainës, Volodymyr Zelensky, i cili ka zhvilluar një bisedë telefonike me drejtuesen e Komisionit Evropian, Ursula von der Leyen. Kreu i shtetit ukrainas ka vënë në dukje se njerëzit në mjaft qytete dhe zona të vendit po përballen me kushte tejet sfiduese për shkak të bombardimeve ruse, duke veçuar si zonat më të goditura kryeqytetin Kiev, rajonin e Dnipropetrovskut, Sumyt, Donetskut, si dhe atë të Khersonit. "E informova Ursulën për sfidat dhe ramë dakord që Bashkimi Evropian të aktivizojë një mekanizëm të posaçëm emergjence. Kjo do të mundësojë ofrimin e shpejtë të fondeve për Ukrainën, për gjërat që janë më të nevojshme në këtë moment. Ekipet tona tashmë po punojnë për këtë", ka shtuar më tej ai. Gjatë kësaj bisede, udhëheqësit diskutuan gjithashtu mbi mbështetjen shtesë në sektorin energjetik dhe atë humanitar, duke u fokusuar te masat përballuese për stinën e dimrit, si dhe te hapat e integrimit evropian të vendit. Kujtojmë se gjatë kësaj jave, Komisioni Evropian prezantoi Paketën vjetore të Zgjerimit, ku u dha një vlerësim inkurajues për hapat para që ka ndërmarrë Ukraina. Në këtë kontekst, Presidenti Zelensky ka theksuar domosdoshmërinë e hapjes së të gjitha grupimeve negociatore dhe nisjes së procesit të mbylljes së kapitujve. Në një prononcim të mëparshëm, kreu i shtetit ukrainas sqaroi se pavarësisht se kapacitetet vendase prodhojnë aktualisht sasi energjie më të lartë se konsumi i brendshëm, dëmet e shkaktuara nga sulmet e vazhdueshme ruse kanë sjellë deficite të ndjeshme në rrjet.