Forca e Sigurisë së Kosovës forcon kapacitetet përmes stërvitjes ushtarake në Kroaci

Përfaqësuesit e Togut të Ndërhyrjes pranë Policisë Ushtarake të Forcës së Sigurisë së Kosovës (FSK) kanë marrë pjesë me sukses në stërvitjen ndërkombëtare të titulluar “Training Based on SOP – Standards of Interventions”, e cila është organizuar në qendrën ushtarake në Slunj të Kroacisë. Kjo ngjarje stërvitore është drejtuar nga ekspertët e Ushtrisë Kroate, respektivisht nga pjesëtarët e Njësisë Kundër Terrorizmit të Policisë Ushtarake të këtij vendi, duke u përqendruar te përmirësimi i aftësive operacionale dhe ngritja e standardeve në fushën e ndërhyrjeve speciale. Gjatë ditëve të trajnimit, ushtarakët kanë kryer një sërë ushtrimesh praktike, të cilat u kanë mundësuar atyre që të përsosin manovrat taktike, të shkëmbejnë praktikat më të mira profesionale, si dhe të njihen për së afërmi me procedurat dhe standardet bashkëkohore të ndërhyrjes. Pjesëmarrja e FSK-së në këtë aktivitet ndërkombëtar ka shërbyer si një mundësi e shkëlqyer për të thelluar partneritetin dhe bashkëpunimin dypalësh në fushën e mbrojtjes mes dy shteteve. Nëpërmjet angazhimit të vazhdueshëm në nisma të tilla dhe bashkëpunimit të ngushtë me aleatët ndërkombëtarë, FSK mbetet e përkushtuar në ngritjen e profesionalizmit, rritjen e shkallës së gatishmërisë dhe modernizimin e kapaciteteve të saj operacionale.