Përgatitjet e Dardanëve, menaxheri Shala zbulon risitë dhe sfidat me lëndimet para dy sfidave vendimtare

Kombëtarja e Kosovës po bëhet gati për sfidat e fundit në kuadër të Ligës së Kombeve, ndërkohë që menaxheri i ekipit kombëtar, Bajram Shala, ka konfirmuar zyrtarisht disa zhvillime të rëndësishme lidhur me grupin e lojtarëve të ftuar. Gjatë paraqitjes së tij para mediave, Shala bëri të ditur se për herë të parë fanellën e Përfaqësueses A do ta veshin tre fytyra të reja: Lindrit Kamberi, Bleon Kurtulus dhe Enis Rexhepi. Sa i përket këtij të fundit, ai sqaroi se administrata është në fazën përmbyllëse të dokumentacionit dhe po pritet drita jeshile, përkatësisht vendimi përfundimtar nga FIFA për t'i dhënë të drejtën e lojës me Kosovën. “Keni pasur mundësinë ta shihni listën e futbollistëve të publikuar ditën e premte dhe keni pasur mundësinë të shihni se me ne do të jenë për herë të parë tre futbollistë të rinj: Lindrit Kamberi, Bleon Kurtulus dhe Enis Rexhepi. Për këtë të fundit, akoma jemi në kompletim të lëndës së tij me dokumente dhe presim përgjigjen, përkatësisht vendimin definitiv të FIFA-s për të drejtën e përfaqësimit, kurse për dy të parët gjithçka tashmë është e ditur”, u exprim Shala. Megjithatë, planet e stafit teknik janë përmbysur pjesërisht për shkak të dëmtimeve fizike. Amir Matoshi dhe Erblin Osmani janë detyruar të tërhiqen për shkak të lëndimeve, ndërsa pikëpyetje mbetet edhe statusi i mbrojtësit Lumbardh Dellova, i cili ka pësuar një lëndim gjatë angazhimit të fundit me skuadrën e tij. Nga ana tjetër, kujtojmë se nga ky grumbullim mungojnë prej kohësh edhe Albian Hoxha, për shkak të një lëndimi afatgjatë, si dhe Vesel Demaku. “Ndërkaq, nga lista e grumbulluar ka disa ndryshime të vogla. Fatkeqësisht, për shkak të lëndimeve, do të mungojnë nga emrat e publikuar më herët Amir Matoshi dhe Erblin Osmani, kurse mbetet për t'u parë gjendja e Lumbardh Dellovës, i cili po ashtu ka pësuar një lëndim në ndeshjen e tij të fundit me klubin. Lumbardhi i bashkohet ekipit dhe më pas, varësisht nga vendimi i stafit mjekësor dhe situatës së tij fizike, do të shihet nëse do ta vazhdojë grumbullimin apo do të zëvendësohet me ndonjë futbollist tjetër. Ndërkaq, nga listat paraprake tashmë keni pasur mundësi t'i shihni futbollistët që për shkak të lëndimeve mungojnë në këtë grumbullim. Dihet se Albian Hoxha është i lënduar për një kohë më të gjatë, kurse për shkak të lëndimit mungon edhe Vesel Demaku”, shtoi ai. Në aspektin e kalendarit, Kosova do të zhvillojë ndeshjen e parë kundër Izraelit më 14 nëntor në shtëpi, në stadiumin “Fadil Vokrri” në Prishtinë, kurse tri ditë më vonë, më 17 nëntor, do të udhëtojë drejt Dublinit për t'u përballur me Republikën e Irlandës.