Trump optimist për marrëveshjen me Iranin: Gjasat për sulme të reja janë minimale nëse vijojnë bisedimet

Presidenti amerikan, Donald Trump, ka deklaruar se ekziston një mundësi “shumë e vogël” që Shtetet e Bashkuara të ndërmarrin fushata të reja bombardimesh ndaj Iranit, me kusht që të shënohet progres i dukshëm në bisedimet paqësore. Në një prononcim për CNN-in dhënë më 8 nëntor, kreu i Shtëpisë së Bardhë theksoi se gjithçka varet nga gatishmëria e delegacionit iranian për të firmosur një pakt tejet të fortë, duke shtuar se në këtë skenar nevoja për ndërhyrje ushtarake bëhet pothuajse e panevojshme. Megjithatë, Trump paralajmëroi se në rast të një dështimi dhe rikthimit të armiqësive, Pentagoni tashmë ka përcaktuar shënjestrat strategjike në infrastrukturën e Teheranit, duke përfshirë këtu 38 ura të cilat mund të neutralizohen brenda një ore të vetme. Në një linjë tjetër komunikimi në rrjetet sociale, ai i bëri jehonë operacionit të koduar “Task Force Iron Gate”, që ka për qëllim bllokimin e kontrabandës së armëve të sofistikuara dhe mallrave të tjera të sanksionuara përgjatë kufijve tokësorë të Iranit dhe zonës së Detit Kaspik. Këto deklarata vijnë në një fazë kur incidentet e izoluara dhe shkëmbimet e zjarrit mes palëve vazhdojnë të godasin anijet tregtare dhe infrastrukturën bregdetare në dhe rreth Ngushticës së Hormuzit. Ndërkohë, vetë Trump onestisht pranoi se konflikti i hapur me Republikën Islamike ka qenë një nga faktorët kryesorë që i kushtoi Partisë Republikane humbje të dhimbshme në zgjedhjet e mesmandatit të mbajtura javën e kaluar në SHBA. Më prerë u shpreh zëvendëspresidenti JD Vance, i cili shihet si një nga pretendentët kryesorë për garën presidenciale të vitit 2028, duke pohuar hapur se shkaktari kryesor i disfatës elektorale ishte pikërisht angazhimi në këtë luftë. Duke iu përgjigjur pyetjeve të gazetarëve po më 8 nëntor, Trump vërejti se pikëpamjet e Vance për Iranin nuk janë pritur mirë nga një pjesë e konsiderueshme e opinionit publik. Sekretari i Shtetit, Marco Rubio, një tjetër emër i lakuar republikan për zgjedhjet e ardhshme presidenciale të vitit 2028, preferoi të mos hyjë në detaje se si situata e luftës ndikoi në rezultatet e votimeve, por mbrojti vendosmërinë e administratës. “Ajo që mund të konfirmoj është se presidenti identifikoi një rrezik real dhe afatgjatë për sigurinë kombëtare dhe veproi menjëherë për ta neutralizuar atë”, uë shpreh Rubio. Ai shtoi se momentalisht nuk sheh shenja të një kthese vendimtare drejt paqes, duke e vënë theksin te diplomatika si zgjedhja e parë e Uashingtonit, e cila fatkeqësisht mbetet e vështirë për t'u arritur për shkak të kërkesave jorealiste dhe absurde të palës iraniane. Gjatë bashkëbisedimit me mediat, Trump bëri të ditur gjithashtu se gjatë samitit të APEC-it që do të zhvillohet javën e ardhshme në Kinë, ai planifikon të takohet me homologun rus, Vladimir Putin, dhe atë kinez, Xi Jinping, ku situata rreth Iranit do të jetë në qendër të agjendës. Tensionet mes Uashingtonit dhe Teheranit kanë shënuar nivele kritike gjatë vitit 2026, si pasojë e sulmeve të koordinuara amerikano-izraelite kundër caqeve iraniane dhe kundërpërgjigjeve ushtarake të regjimit në rajon. Në themel të krizës qëndrojnë programi bërthamor dhe ambiciet ushtarake të Iranit, të cilat SHBA dhe aleatët i cilësojnë si rrezik ekzistencial, ndërsa Teherani i konsideron sulmet si shkelje flagrante të integritetit të tij territorial. Përplasjet kanë hedhur hije dyshimi dhe frikë mbi lundrimin e lirë tregtar në Ngushticën e Hormuzit, e cila mbetet arteria kryesore e furnizimit global me naftë, teksa përpjekjet diplomatike për të gjetur një kompromis vijojnë të mbeten të hapura.