Simeone del në mbrojtje të Alvarezit pas humbjes ndaj Barcelonës: “Kemi nevojë për të në formën më të lartë”

Humbja 2-1 që Atletico Madridi pësoi në fushën e vet përballë Barcelonës u shoqërua me kritika ndaj sulmuesit Julian Alvarez për rastet e shpërdoruara. Megjithatë, tekniku Diego Simeone ka vendosur ta mbrojë publikisht yllin argjentinas, duke kërkuar durim dhe besim të plotë ndaj tij. Me këtë disfatë në shtëpi, skuadrës kryeqytetase iu ndërpre ecuria mbresëlënëse prej shtatë fitoresh radhazi në kampionatin spanjoll. Edhe pse Alvarez dhuroi pasimin vendimtar për golin e Giuliano Simeones që kaloi vendasit në epërsi që në minutën e 10-të, ai u shfaq jo i saktë para portës në disa momente kyçe që mund të kishin ndryshuar fatin e takimit. Katalanasit shfrytëzuan rastet e tyre dhe përmbysën shifrat me protagonizmin e Fermin Lopezit. Ky i fundit barazoi rezultatin pak para mbylljes së pjesës së parë, ndërsa në minutën e 66-të realizoi edhe golin e fitores, i ndihmuar nga asistimi i Lamine Yamal. Pavarësisht rasteve të humbura, trajneri Diego Simeone refuzoi ta vendosë sulmuesin e tij nën presion, duke vlerësuar punën e madhe që ai bëri përgjatë gjithë përballjes. "Julian pati një ndeshje të mirë," deklaroi strategu argjentinas gjatë konferencës për media pas përfundimit të sfidës. Simeone nënvizoi se kontributi i Alvarezit shkoi përtej asistimit të golit të parë: "Përveç asistimit të golit për Giulianon, ai gjithashtu bëri një krosim për një shans të Alex Baenës. Ne të gjithë donim që ai ta shënonte atë gol, por do të jemi të duruar me të sepse është një lojtar i shkëlqyer." Më tej, tekniku i Atletico-s spikati rëndësinë e sulmuesit për suksesin e skuadrës: "Ne e duam atë dhe, nëse do të arrijmë atë që duam të arrijmë, na duhet Juliani në formën e tij më të mirë - përndryshe nuk do të arrijmë atje." Kjo humbje e lë Atletico Madridin në pozitën e tretë në tabelën e La Ligës, tashmë pesë pikë prapa Barcelonës. Skuadra e Simeones do të synojë të rikthehet te rezultatet pozitive menjëherë pas përfundimit të pushimit për ndeshjet ndërkombëtare.