Parashikimi i motit: Kushte të paqëndrueshme, ja ku do të ketë reshje shiu dhe shtrëngata sot

Shqipëria do të karakterizohet sot nga kushte të paqëndrueshme atmosferike, duke sjellë një mot të paqëndrueshëm që do të shoqërohet me vranësira mesatare dhe të dendura, të ndërprera herë pas here nga intervale me diell. Gjatë orëve të para të ditës, reshjet e shiut me intensitet të ulët do të jenë të pranishme në pjesën më të madhe të vendit. Në vijim të ditës, reshjet do të jenë sporadike dhe me intensitet të ulët, ndërsa lokalisht në zonën e qendrës dhe të jugut pritet të ketë edhe shtrëngata afatshkurtra. Sipas Shërbimit Meteorologjik Ushtarak (SHMU), pas mesditës reshjet do të dobësohen, duke mbetur kryesisht prezente me intensitet të ulët përgjatë relieveve malore në juglindje dhe lokalisht në veri të vendit. Për sa i përket erës, ajo do të fryjë nga drejtimi i juglindjes dhe jugperëndimit me një shpejtësi mesatare prej 5 metrash për sekondë. Megjithatë, përgjatë vijës bregdetare dhe në zonat e luginave, erërat pritet të fitojnë vrull, duke arritur shpejtësi deri në 15 metra për sekondë. Ndërkohë, situata në det do të jetë e qetë deri mesatare, me një forcë të valëzimit që llogaritet në kufijtë e 2 deri në 3 ballë.