Parashikimi i motit: Vranësira dhe reshje shiu në vend, ja ku priten shtrëngata

Për ditën e sotme, territori shqiptar do të karakterizohet nga kushte atmosferike të paqëndrueshme. Parashikohet që mbizotëruese të jenë vranësirat mesatare deri të dendura, të shoqëruara herë pas here edhe me intervale me diell. Gjatë orëve të para të ditës, reshjet e shiut me intensitet të ulët pritet të përfshijnë pjesën më të madhe të vendit. Në vijim të ditës, reshjet do të jenë sporadike dhe me intensitet të ulët, ndërsa kohë pas kohë do të shoqërohen me shtrëngata afatshkurtra, të cilat do të jenë më të theksuara në zonën qendrore dhe atë jugore. Sipas Shërbimit Meteorologjik Ushtarak (SHMU), pas mesditës reshjet do të vijojnë të jenë të pranishme, por me intensitet kryesisht të ulët, duke u përqendruar përgjatë relieveve malore në juglindje dhe lokalisht në zonën veriore. Sa i përket erës, ajo do të fryjë nga drejtimi i juglindjes dhe jugperëndimit me një shpejtësi mesatare prej 5 metrash për sekondë. Megjithatë, përgjatë vijës bregdetare dhe në zonat e luginave, era do të fitojë shpejtësi deri në 15 metra për sekondë. Në det, kushtet do të jenë të favorshme me një valëzim që llogaritet të jetë i forcës 2 deri në 3 ballë.