Zbulimi i çuditshëm: Pacientët me probleme kardiake dhe tension të lartë konsumojnë më pak fruta

Të rriturit që përballen me tension të lartë të gjakut, nivele të larta të kolesterolit apo që kanë kaluar një infarkt miokardi tregojnë një prirje më të ulët për të konsumuar fruta të plota krahasuar me bashkëmoshatarët e tyre që gëzojnë shëndet të plotë. Ky përfundim ka dalë nga një analizë e detajuar e të dhënave që përfshijnë mbi 371 mijë qytetarë amerikanë. Kërkimi shkencor, i udhëhequr nga ekspertë të Universitetit të Dakotës së Veriut në bashkëpunim me Qendrën e Kërkimit të Ushqyerjes pranë Departamentit të Bujqësisë të SHBA-së në Grand Forks, është bërë publik në revistën 'Current Developments in Nutrition'. Për realizimin e tij, autorët janë mbështetur te të dhënat e anketës vjetore shëndetësore të vitit 2019, e cila administrohet rregullisht nga Qendrat për Kontrollin dhe Parandalimin e Sëmundjeve në Shtetet e Bashkuara (CDC). Gjatë këtij sondazhi, pjesëmarrësit kanë raportuar mbi frekuencën e konsumit të frutave të plota dhe lëngjeve të frutave 100 për qind. Gjithashtu, ata janë përgjigjur nëse u është vënë ndonjëherë diagnoza e hipertensionit, dislipidemisë, anginës pektoris, sëmundjeve koronare, apo nëse kanë pësuar ndonjëherë sulm në zemër apo goditje në tru. Rezultatet treguan se, mesatarisht, individët konsumonin fruta të plota 1.06 herë në ditë dhe lëngje frutash 0.3 herë në ditë. Megjithatë, diferencat mbetën të dukshme edhe pasi u morën parasysh faktorë demografikë si mosha dhe të ardhurat. Individët e diagnostikuar me hipertension, kolesterol të lartë, sëmundje të zemrës apo ata që i kishin mbijetuar një ataku kardiak shfaqën shkanca më të ulëta të konsumit të frutave të freskëta në krahasim me personat pa këto probleme shëndetësore. Ky dallim mbeti i pandryshuar edhe pas përfshirjes së variablave të tjerë në llogaritje, përfshirë moshën, nivelin arsimor, të ardhurat financiare dhe zakonin e duhanpirjes. Për shembull, personat që kishin kaluar një atak në zemër konsumonin fruta mesatarisht 0.98 herë në ditë, ndërsa pjesa tjetër 1.07 herë. Sa i përket goditjes në tru, ky ndryshim rezultoi se vlen vetëm para se të llogariteshin faktorët e sipërpërmendur. Në anën tjetër, situata paraqitet e larmishme sa i takon lëngjeve të frutave. Pasi u eliminuan ndikimet e faktorëve të tjerë, dallimet u vërejtën vetëm në dy grupe: personat me infarkt të mëparshëm konsumonin lëngje pak më shpesh se të tjerët, kurse ata me kolesterol të lartë i përdornin ato me ritme më të rralla. Arsyeja e mundshme që lidhet me humbjen e fibrave gjatë procesit të shtrydhjes. Si një shpjegim të mundshëm për këto dukuri, autorët vënë theksin te fibrat dietike, sasia e të cilave reduktohet ndjeshëm gjatë procesit të nxjerrjes së lëngut. Sipas të dhënave zyrtare të ushqyerjes në SHBA, një filxhan lëng portokalli 100 për qind përmban vetëm 0.5 gram fibra, ndërsa një filxhan me feta portokalli ofron plot 3.6 gram. Fruti i plotë përmban gjithashtu polifenole, të cilat udhëtojnë të patretshme deri në zorrën e trashë, ku më pas metabolizohen nga flora bakteriale. Pavarësisht kësaj, hulumtuesit nënvizojnë se kërkimet e mëparshme kanë dëshmuar efekte pozitive të lëngjeve për shëndetin e zemrës, nëse ato konsumohen në doza të moderuara deri në 200 mililitra në ditë. Nga ana e saj, Shoqata Amerikane e Zemrës këshillon një gamë të gjerë frutash e perimesh, duke sugjeruar njëkohësisht kufizim të pijeve të lëngshme. Natyra e studimit nuk jep konkluzione shkak-pasojë. Ekspertët bëjnë me dije se ky studim dëshmon vetëm ekzistencën e një korrelacioni dhe nuk konfirmon se mungesa e frutave shkakton patologji kardiake. Është krejtësisht e mundur edhe skenari i kundërt, ku pacientët kanë ndryshuar regjimin e tyre ushqimor pasi kanë marrë diagnozën mjekësore. Vlen të theksohet se anketa ka matur vetëm shpeshtësinë e konsumit dhe jo sasinë e saktë të ngrënë, ndërsa të dhënat bazohen tërësisht te kujtesa e vetë pjesëmarrësve, pa përfshirë në analizë peshën trupore, aktivitetin fizik apo elementë të tjerë të dietës. Kërkimi u mbështet financiarisht nga Departamenti i Bujqësisë i SHBA-së, ndërsa në deklaratën e konfliktit të interesit bëhet e ditur se autori kryesor është i punësuar pranë kompanisë 'VDF FutureCeuticals'.