Mourinho i drejtohet Ancelottit për Endrickun: Ja çfarë kërkon tekniku portugez për sulmuesin brazilian

Jose Mourinho ka rikthyer sërish në qendër të vëmendjes situatën e sulmuesit Endrick, duke bërë bujë me deklaratat e tij pas fitores 3-0 që Real Madridi arriti kundër Valencias në stadiumin “Mestalla”. Sipas raportimeve të mediave ndërkombëtare, strategu portugez i ka përcjellë një mesazh të qartë homologut të tij te kombëtarja e Brazilit, Carlo Ancelotti, lidhur me të ardhmen e afërt dhe minutazhin e lojtarit. Mourinho dëshiron me çdo kusht që futbollisti i tij të grumbullojë minuta loje gjatë periudhës së ardhshme të ndeshjeve ndërkombëtare. Madje, ai nuk do të kishte asnjë kundërshtim nëse kjo do të ndodhte larg “Santiago Bernabeut”. “Mendimi im është i qartë, dua që Endrick të luajë. Nëse Ancelotti e aktivizon gjatë pushimit të ardhshëm për ndeshjet e kombëtareve, do të jem i lumtur”, ka deklaruar Mourinho në daljen e tij publike. Këto komente marrin një peshë specifike, duke pasur parasysh hapësirën jashtëzakonisht të kufizuar që sulmuesi i ri ka pasur deri më tani nën urdhërat e “Los Blancos”. Trajneri duket i gatshëm t'i lejojë mundësinë Ancelottit që t'i japë brazilianit ato minuta që ai ende nuk ka arritur t'i sigurojë në Madrid. Statistikat flasin qartë për realitetin e vështirë të lojtarit, i cili këtë edicion ka regjistruar vetëm 141 minuta në fushë, të ndara në 85 minuta në La Ligë dhe 56 minuta në Ligën e Kampionëve. Gjithsej, ai numëron shtatë paraqitje, një gol dhe një asistim, ndërsa vetëm në një ndeshje ka nisur si titullar. Një bilanc tejet modest për një futbollist që u kthye te Real Madridi pasi pati një paraqitje të shkëlqyer në Francë. Endrick e mbylli mjaft suksesshëm edicionin e kaluar i huazuar te Olympique Lyonnais, ku shfrytëzoi çdo mundësi për të rifituar formën dhe vetëbesimin, duke shënuar tetë gola dhe duke dhënë po aq asistime në 21 ndeshje. Këto shifra premtuese rritën ndjeshëm pritshmëritë për rikthimin e tij në “Bernabeu”, ku mendohej se do të kishte një rol kyç në planet e Mourinhos. Megjithatë, konkurrenca e ashpër në skuadër ka bërë që situata të komplikuar edhe më shumë për talentin brazilian. Ardhja e Carlos Espí dhe transferimi i Yan Diomandes kanë zvogëluar ndjeshëm hapësirat e aktivizimit për Endrickun. Duke qenë se portugezi ka në dispozicion alternativa të shumta në fazën e sulmit, braziliani e ka pasur të pamundur të sigurojë një vend stabël në rotacion, pavarësisht formës së mirë që kishte treguar më parë në tokën franceze. E ardhmja e tij te gjiganti spanjoll ishte vënë në pikëpyetje serioze edhe në ditët e fundit të afatit kalimtar të verës. Roma ishte shumë pranë mbylljes së një marrëveshjeje huazimi për lojtarin, por ishte pikërisht Mourinho ai që ndërhyri për të bllokuar transferimin, duke vendosur ta mbajë në skuadër. Në daljet e tij publike, trajneri e ka mbrojtur fuqishëm potencialin e sulmuesit, duke paralajmëruar se çdo klub i interesuar do të duhet të negociojë drejtpërdrejt me të për të siguruar shërbimet e brazilianit. Mungesa e vazhdueshme e minutave e ka rikthyer sërish në qendër të diskutimeve opsionin e largimit, ku mediat nuk përjashtojnë një huazim të mundshëm gjatë merkatos së janarit nëse situata nuk ndryshon rrënjësisht në javët në vijim. Ndërkohë, klubi i Romës mbetet në gatishmëri duke e përcjellë me vëmendje situatën e tij, ndërsa nuk mungojnë as skuadrat e tjera që kanë shprehur interesim konkret për të.