Zbardhen detajet e reja për serinë Xiaomi 18: Çfarë pritet të shohim nga gjenerata e ardhshme e telefonave inteligjentë

Seria Xiaomi 18 Pro u prezantua zyrtarisht në Kinë gjatë muajit shtator, ndërsa kompania ka konfirmuar tashmë se të dyja këto pajisje do të jenë të qasshme në tregun global deri në përfundim të këtij viti. Madje, lançimi global i modeleve Xiaomi 18 Pro dhe 18 Pro Max pritet të ndodhë qysh gjatë këtij muaji. Megjithatë, mungesa e çfarëdolloj përmmendjeje për modelin bazë Xiaomi 18 në njoftimet zyrtare ka ngritur dyshime nëse adhuruesit e teknologjisë do të kenë mundësi të shohin një pasardhës të drejtpërdrejtë të modelit Xiaomi 17 brenda këtij viti. Pavarësisht këtyre paqartësive, një regjistrim i fundit në sistemin 3C dëshmon të kundërtën dhe përkon me aludimet e mëparshme se modeli Xiaomi 18 do të debutojë më vonë, me gjasë gjatë muajit dhjetor. Kjo dritare kohore lidhet kryesisht me promovimin dhe nxjerrjen në treg në tregun kinez. Dokumentacioni i certifikimit zbulon një pajisje të re nga kjo kompani, e cila identifikohet si modeli bazë Xiaomi 18, dhe që do të mbështesë karikim të shpejtë me kabllo prej 100W. Ky parametër tregon se prodhuesi nuk ka sjellë ndryshime në shpejtësinë e karikimit në krahasim me pajisjen e vitit të kaluar. Sipas informacioneve të deritanishme, ky smartphone pritet të vijë i pajisur me çipsetin Snapdragon 8 Elite Gen 6, duke përjashtuar versionin "Extreme", një sensor kryesor të kamerës me rezolucion 200 megapikselë, si dhe një bateri masive me kapacitet prej 7.200 mAh. Për sa i përket ekranit, përmasat e tij mbeten ende të panjohura dhe mund të ndryshojnë nga gjenerata e kaluar, duke marrë parasysh se kësaj radhe është modeli Xiaomi 18 Pro ai që vjen me një dizajn më kompakt dhe ekran prej 6,4 inçësh. Në anën tjetër, duke u nisur nga thashethemet se modeli standard Xiaomi 18 do të ketë një bateri 200 mAh më të madhe se versioni 18 Pro, mund të konkludohet se nga ana e përmasave ky model do të pozicionohet diku mes varianteve Pro dhe Pro Max.