Florida ndërmerr hapa ligjorë kundër OpenAI: Kërkohet ndalimi i zhvillimit të ChatGPT

Autoritetet shtetërore në Florida i janë drejtuar zyrtarisht një gjykate me kërkesën për të pezulluar çdo zhvillim të mëtejshëm të modelit të njohur të inteligjencës artificiale, ChatGPT, deri në momentin që kompania OpenAI të implementojë mekanizma efektivë sigurie për mbrojtjen e konsumatorëve dhe shoqërisë. “Mos e quani më të sigurt. Mos u shtirni sikur është njeri. Mos ua shisni më fëmijëve”, shkroi prokurori i përgjithshëm i Floridës, James Uthmeier, përmes një njoftimi të bërë publik të hënën në platformën X, ku njoftoi edhe ndërmarrjen e kësaj nisme ligjore. Uthmeier, i cili i përket radhëve të Partisë Republikane, ka mbajtur më parë detyrën e shefit të kabinetit për guvernatorin republikan të këtij shteti, Ron DeSantis, deri në vitin 2025. Kjo kërkesë për rregullimin dhe vendosjen e kufizimeve mbi ChatGPT-në dhe teknologjitë e ngjashme të inteligjencës artificiale shkon në krah të kundërt me linjën e administratës së presidentit amerikan Donald Trump, i cili i ka kundërshtuar rregulloret mbrojtëse dhe i ka cilësuar shqetësimet e ngritura si “mashtrime”. Në padinë e dorëzuar pranë Gjykatës së Qarkut të 10-të Gjyqësor të Floridës, në kontenë Highlands, Uthmeier theksoi se shteti është mbështetur në paralajmërimet e vetë drejtorit ekzekutiv të OpenAI-t, Sam Altman, i cili ka pranuar se inteligjenca artificiale paraqet rrezik serioz publik në mungesë të protokolleve të duhura të sigurisë. Vetëm një javë më parë, gjatë një fjalimi para Këshillit të Sigurimit të Kombeve të Bashkuara, Altman paralajmëroi se njerëzimi rrezikon të “humbasë kontrollin mbi të ardhmen e inteligjencës artificiale”. Ai ishte i pranishëm krah drejtuesve të kompanive konkurruese, Anthropic dhe Hugging Face, të cilët gjithashtu apeluan për ndërhyrje rregullatore nga shteti për të kontrolluar e ecurisë së kësaj industrie. “I kërkojmë gjykatës të bëjë atë që OpenAI nuk do ta bëjë me nismën e vet: të mbrojë familjet e Floridës”, u shpreh më tej prokurori i përgjithshëm Uthmeier. Ky hap i ndërmarrë nga Florida pason një padi të mëparshme të ngritur nga ky shtet gjatë këtij viti, e cila trajtonte pasojat shqetësuese të ChatGPT-së te fëmijët dhe shtresat e tjera të përdoruesve. Në dokumentet e padisë, autoritetet vendase ngritën akuza se qytetarët po “nxiteshin” drejt vetëvrasjes dhe se sistemi i inteligjencës artificiale kishte “ndihmuar dhe nxitur sulme vdekjeprurëse”.