Lëkundje të fuqishme sizmike godasin Japoninë: Raportohen dhjetëra të lënduar dhe bllokim i linjave hekurudhore

Japonia qendrore është përballur me një goditje sizmike me magnitudë 5.7 të shkallës Rihter gjatë orëve të natës mes të shtunës dhe të dielës. Si pasojë e lëkundjeve, më shumë se 20 persona kanë mbetur të lënduar, ndërsa në disa zona janë regjistruar edhe dëme materiale. Sipas të dhënave zyrtare nga Agjencia Meteorologjike e Japonisë, ngjarja sizmike u regjistrua në orën 01:04 sipas kohës lokale, me një thellësi vatror prej 40 kilometrash. Epiqendra e tërmetit u lokalizua në pjesën perëndimore të prefekturës Shizuoka, rreth 200 kilometra në perëndim të kryeqytetit, Tokio. Mediat vendase, përfshirë gazetën "Chunichi Shimbun" dhe rrjetin televiziv "Tokai", bëjnë me dije se numri i të lënduarve ka arritur në 24 persona në prefekturën Shizuoka dhe në atë fqinje të Aichi-t. Një përfaqësues i shërbimeve të urgjencës në Aichi konfirmoi se 16 qytetarë kishin pësuar lëndime të lehta. Ndërkohë, autoritetet lokale në Shizuoka raportuan për tre të plagosur, mes të cilëve edhe një e moshuar 90-vjeçare, e cila u rrëzua nga shtrati si pasojë e goditjes. Përveç pasojave në njerëz, tërmeti shkaktoi dëme materiale, ku në qytetet e prekura u raportua për dritare të thyer. Gjithashtu, lëkundjet detyruan autoritetet të pezullojnë përkohësisht shërbimet hekurudhore, përfshirë edhe linjën e trenit me shpejtësi të lartë "Shinkansen". Japonia mbetet një nga rajonet më të ekspozuara ndaj aktivitetit sizmik në rruzullin tokësor, për shkak të pozicionimit të saj mbi pikëtakimin e katër pllakave tektonike. Sipas statistikave, arkipelagu japonez përballon rreth 18 për qind të të gjithë tërmeteve që regjistrohen çdo vit në nivel global. Ndonëse pjesa më e madhe e lëkundjeve nuk lënë pasoja të rënda, vendi vazhdon të mbajë në memorien kolektive tragjedinë e 11 marsit 2011, kur një tërmet shkatërrues prej 9.0 shkallësh nxiti një cunami gjigant. Ajo katastrofë la më shumë se 18,500 viktimë dhe të zhdukur, si dhe shkaktoi avarinë e rëndë në centralin bërthamor të Fukushimës.