Përplasje zinxhir në Angli: 30 automjete përfshihen në aksident për shkak të mjegullës, dy të plagosur rëndë

Një ngjarje e rëndë ka tronditur autostradën M20 në Angli, ku më shumë se 30 automjete janë përfshirë në një aksident masiv për shkak të kushteve atmosferike, duke lënë dy persona me lëndime të rënda dhe duke bllokuar qarkullimin për orë të tëra. Autoritetet policore të Kentit bëjnë me dije se përplasja ka ndodhur të shtunën, rreth orës 18:41, në korsinë me drejtim Londer, pranë zonës së Hollingbourne në Maidstone. Sipas Autoritetit Kombëtar të Autostradave ("National Highways"), vizibiliteti në zonë ishte tejet i ulët si pasojë e një mjegulle të dendur, çka detyroi mbylljen e përkohshme të segmentit rrugor në të dyja drejtimet, mes nyjeve 8 dhe 9. Në vendin e ngjarjes kanë ndërhyrë menjëherë ekipet e shpëtimit, përfshirë Shërbimin e Zjarrfikësve dhe Shpëtimit të Kentit me tre automjete dhe një njësi teknike. Nga 11 personat që morën ndihmë mjekësore në vendngjarje, dy prej tyre pësuan lëndime të rënda dhe u transportuan me urgjencë në spital. Dëshmitarët okularë dhe drejtuesit e mjeteve kanë ndarë detaje tronditëse në rrjetet sociale, duke theksuar rrezikshmërinë e lartë në rrugë. Rob Rattenbury, një nga shoferët, u shpreh se mjegulla kishte rënë papritur dhe ishte aq e dendur sa detyroi të gjithë drejtuesit të reduktonin shpejtësinë në rreth 48 km/h. Një tjetër dëshmitare, Ema Louise, tregoi se kishte dëgjuar vetëm tingullin e përplasjes së fortë pa mundur të shihte asgjë nga velloja e dendur e mjegullës. Ndërkohë, disa qytetarë ngritën dyshime se dukshmëria mund të jetë përkeqësuar edhe më shumë nga tymi i një shfaqjeje me fishekzjarrë në afërsi. Qarkullimi në autostradë u rikthye plotësisht rreth orës 05:00 të mëngjesit të së dielës, pasi Autoriteti Kombëtar i Autostradave konfirmoi rihapjen e të dyja korsive. Megjithatë, shërbimi meteorologjik britanik ("Met Office") ka mbajtur në fuqi një paralajmërim për mjegull deri në orën 10:00 të së dielës, duke përfshirë një pjesë të konsiderueshme të Anglisë jugore dhe rajonit të Midlands.