I hyjmë një fundjave me surpriza atmosferike: Ja si do të sillet moti gjatë kësaj dite

Depërtimi i masave të reja ajrore, të ardhura nga zonat jugperëndimore të kontinentit europian gjatë ditës së diel, pritet të sjellë një rritje të temperaturave në vend, shoqëruar me një kombinim të intervaleve me diell dhe vranësirave të shpeshta. Sipas parashikimeve meterologjike, vranësirat do të manifestohen më qartësisht në pjesën lindore të territorit, ku nuk do të mungojnë reshjet e shiut, si dhe reshje të izoluara dëbore në majat më të larta malore. Në intervale të caktuara kohore, reshjet mund të paraqiten edhe në formë rrebeshesh. Ndërkohë, gjatë orëve të pasdites dhe në vijim të natës, pritet një shtim i ndjeshëm i intensitetit të reshjeve në të gjithë shtrirjen gjeografike të vendit. Për sa i përket vlerave termike, termometri do të shënojë rritje si në orët e para të ditës ashtu edhe në mesditë. Minimumi do të regjistrohet në qytetin e Pukës me 2°C, ndërsa pika më e ngrohtë do të jetë në qarqet e Elbasanit dhe Beratit, ku maksimumi do të kapërcejë deri në 23°C. Ekspertët e meteorologjisë paralajmërojnë gjithashtu se era do të fryjë me intesitet mbi mesataren, duke prekur shpejtësi maksimale deri në 60 km/h nga drejtimi jugor. Si pasojë e kësaj situate, në zonat bregdetare deti do të paraqitet me dallgëzim që do të arrijë deri në 3 ballë.