Jeremie Frimpong drejt largimit nga Anglia, gjiganti saudit shfaq interesim konkret

E ardhmja e Jeremie Frimpong te Liverpooli është vënë në pikëpyetje të madhe, vetëm pak muaj pas transferimit të tij në “Anfield”, ndërsa opsioni i një largimi të hershëm po bëhet gjithnjë e më real. Mbrojtësi 25-vjeçar nuk ka arritur të përshtatet plotësisht me ritmin dhe kërkesat e Premierligës, pasi u bashkua me klubin anglez verën e kaluar nga Bayer Leverkuseni për shifrën e 29.5 milionë funteve. Edhe pse u afrua me statusin e një futbollisti tejet ofensiv dhe shpërthyes në krahun e djathtë, reprezentuesi holandez ka shfaqur oshilacione, sidomos në detyrat defensive. Kjo ka bërë që ai të humbasë vendin e sigurt në formacion dhe të mos ketë minutazhin e dëshiruar. Në këto rrethana, flitet për një kalim të mundshëm në Arabinë Saudite, ku skuadra e Al Hilal ka shfaqur interesim serioz dhe po ndjek nga afër situatën e tij, ndërsa lojtari duket i hapur për një sfidë të re në Lindjen e Mesme. Nëse ky transferim konkretizohet, 25-vjeçari do të bëhej pjesë e një grupi lojtarësh të njohur nga futbolli evropian që tashmë aktivizohen te ky klub, ku bëjnë pjesë emra si Crysencio Summerville, Ollie Watkins dhe Gabriel Martinelli. Pavarësisht spekulimeve rreth të ardhmes, Frimpong mbetet i përqendruar te skuadra dhe është në dispozicion për sfidën e së dielës kundër Crystal Palace, pavarësisht se gjasat janë të larta ta nisë nga banka rezervë për shkak të konkurrencës së ashpër. Zhvillime konkrete rreth kësaj çështjeje pritet të ndodhin gjatë afatit kalimtar të janarit, kur do të vendoset përfundimisht fati i karrierës së tij.