Samadrexha shkëlqen në derbin e xhiros, triumf i merituar ndaj Istogut falë paraqitjes fantastike të Arona Krasniqit

Kampionati elitar i Kosovës në hendboll në kategorinë e femrave ka sjellë një tjetër ndeshje spektakolare, ku skuadra e Samadrexhës ka regjistruar një fitore të rëndësishme në kuadër të xhiros së shtatë, duke mposhtur Istogun me shifrat 35:27. Përballja e zjarrtë u zhvillua mbrëmjen e së shtunës në palestrën sportive “Afrim Bunjaku”. Ndeshja u karakterizua nga një rivalitet i fortë dhe intensitet i lartë deri në minutën e 45-të, periudhë gjatë së cilës vendasit patën epërsinë e lehtë por me një Istog këmbëngulës. Edhe pse Samadrexha krijoi epërsi prej gjashtë golash në pjesën e parë (17:11), istogaset reaguan fuqishëm duke barazuar shifrat në 18:18, para se pjesa e parë të mbyllet me rezultat 20:18 në favor të nikoqireve. Megjithatë, pas minutës së 45-të, ritmi i lartë dhe saktësia në fushë bënë që Samadrexha të shkëputet përfundimisht për një triumf bindës. Në aspektin individual, protagonistja kryesore e takimit ishte Arona Krasniqi, e cila shkëlqeu me 12 gola të shënuar për Samadrexhën. Kontribut të çmuar në sulm dhanë edhe Jennifer Abreu me gjashtë gola dhe Vitoria Oliveira me pesë, ndërsa portierja Anastasija Coguriq kontribuoi vendimarisht me pritjet e saj kyçe. Te skuadra e Istogut, më e dalluara në aspektin realizues ishte Eya Nasr me 11 gola, e ndjekur nga Farida Mabrouk dhe Mayssem Azri që shtuan nga pesë secila. Pas këtij rezultati, Samadrexha përforcon pozitën e parë në tabelën e klasifikimit me 12 pikë të tubuara nga gjashtë ndeshje të zhvilluara. Ndërkohë, Istogu pozicionohet në vendin e tretë me tetë pikë nga pesë ndeshje. Në kuadër të kësaj xhiroje, po të shtunën u zhvillua edhe sfida mes Ulpianës dhe Shqiponjës, ku kjo e fundit triumfoi thellësisht me rezultatin 55:8. Pas kësaj fitoreje, Shqiponja renditet në vendin e dytë të tabelës me tetë pikë nga pesë ndeshje. Në anën tjetër, skuadra e Ulpianës vazhdon të mbetet në fund të renditjes pa e shijuar ende fitoren dhe pa asnjë pikë të tubuar.