Trump kërkon nisjen e menjëhershme të hetimeve nga Departamenti i Drejtësisë ndaj demokratëve

Presidenti Donald Trump ka paralajmëruar se do t'i kërkojë Departamentit të Drejtësisë që të nisë një hetim zyrtar ndaj demokratëve, pasi sipas tij, ata po lëshojnë kërcënime për shkarkim dhe forma të ndryshme ndëshkimi ndaj zyrtarëve të administratës, bizneseve dhe donatorëve të projektit të tij për sallën e vallëzimit, në një kohë kur ai përballet me dinamika të reja politike në Kongres. Në një reagim të publikuar të shtunën në platformën Truth Social, Trump u shpreh se demokratët po synojnë Prokurorin e Përgjithshëm të Shteteve të Bashkuara dhe individë të tjerë me kërcënime për largim nga detyra dhe sanksione të tjera, pavarësisht se vetë ata pranojnë mungesën e fakteve apo të shkeljeve që mund të justifikojnë një proces të tillë. Ai e cilësoi këtë qasje si një formë të rëndë zhvatjeje. Kreu i Shtëpisë së Bardhë shtoi gjithashtu se përgjegjësit për këto veprime duhet të përballen me burgim, duke u bërë thirrje republikanëve që të reagojnë me shpejtësi. Sipas tij, udhëheqësit politikë demokratë u kanë drejtuar letra kërcënuese një numri personash të pafajshëm, ndaj dhe urdhëroi zyrtarisht Departamentin e Drejtësisë që të hetojë menjëherë këtë akt që e cilësoi si kriminal. Kjo situatë vjen pas lëvizjeve të senatorit Richard Blumenthal, i cili pritet të marrë drejtimin e një panelit kyç hetimor në Senat kur demokratët të marrin kontrollin e Kongresit në janar. Të enjten, ai u dërgoi shkresa zyrtare disa kompanive dhe zyrtarëve të administratës Trump, duke u kërkuar atyre bashkëpunim në hetimet e ardhshme. Mes subjekteve që kanë pranuar këto letra janë Sekretari i Sigurisë Kombëtare Markwayne Mullin, Kryetari i Komisionit Federal të Komunikimeve Brendan Carr, si dhe donatorë të Shtëpisë së Bardhë, ku përfshihen gjigantë teknologjikë si Amazon, Apple dhe Google. Po ashtu, shkresa kanë marrë edhe kompanitë e kriptomonedhave World Liberty Financial, Binance dhe Tether. Senatori Blumenthal ka paralajmëruar se nënkomiteti do të shqyrtojë masa alternative për të garantuar pajtueshmërinë, nëse zyrtarët dhe kompanitë nuk dorëzojnë të dhënat e kërkuara deri më 4 janar, një ditë pas konstituimit të Kongresit të ri. Megjithatë, personat dhe subjektet e prekura nuk kanë detyrim ligjor të përgjigjen deri në momentin kur legjislativi i ri të marrë zyrtarisht detyrën.