Zgjedhjet për Bashkinë e Tiranës, Erion Braçe kërkon garë të brendshme: Kandidati të dalë nga procesi demokratik partiak

I ftuar në emisionin “Goca dhe Gra”, deputeti i Partisë Socialiste, Erion Braçe, ka diskutuar mbi zhvillimet aktuale politike, protestat, si dhe mbi raportin e tij me forcën politike që përfaqëson, duke ndarë qëndrime të qarta për çështje kyçe të qeverisjes dhe Tiranës. Gjatë bisedës, ai është ndalur te gara për Bashkinë e Tiranës, ku ka përsëritur qëndrimin e tij të prerë se emri i kandidatit socialist duhet të dalë domosdoshmërisht përmes një gare të brendshme partiake, një parim të cilit ai thotë se do t'i qëndrojë besnik deri në fund. Duke u ndalur te situata në kryeqytet dhe protestat, Braçe ka bërë një ndarje mes shqetësimeve të përditshme të qytetarëve dhe akteve të dhunshme. Sipas tij, ngjarjet po ndikojnë negativisht te qytetarët duke u shkaktuar vonesa dhe frikë në jetën e përditshme, ndërsa theksoi se interesat legjitime të protestuesve duhet të merren në konsideratë nga qeveria dhe shumica parlamentare. Politikani socialist ka theksuar gjithashtu rëndësinë e të thënurit të së vërtetës kudo që ndodhet, qoftë në strukturat partiake, në parlament apo në publik, duke shtuar se nuk i intereson se kush mund të ndihet i prekur nga opinionet e tij të sinqerta. I pyetur se çfarë do të ndryshonte menjëherë në Tiranë nëse do të kishte mundësi, Braçe u tregua kritik ndaj gjendjes aktuale të higjienës në qytet, duke e cilësuar kryeqytetin si të papastër në momentin që flasim. Në lidhje me pyetjet për zonjën Arta Dade dhe deputeten e re në parlament, Braçe u shpreh se kjo e fundit i takon një fushe tjetër profesionale, atë të drejtësisë, e cila është larg profesionit të tij si ekonomist. Ai shtoi me ironi se ajo është në vitin e parë të mandatit të parë, duke kujtuar se edhe vetë ai ka qenë në të njëjtën fazë në fillimet e tij parlamentare.