Sulmi me armë në Krakov, kryeministri polak Tusk: Një nga efektivët e plagosur po lufton për jetën

Kryeministri i Polonisë, Donald Tusk, ka reaguar ashpër ndaj sulmit të armatosur ndodhur në qytetin e Krakovit, duke konfirmuar se është në kontakt të vazhdueshëm me ministrin e Punëve të Brendshme për të ndjekur nga afër ecurinë e hetimeve. Kreu i qeverisë polake bëri të ditur se strukturat e rendit janë angazhuar plotësisht për të zbardhur motivet dhe të vërtetën e plotë rreth kësaj ngjarjeje të rëndë. Me këtë rast, ai nuk la pa përmendur dhimbjen për viktimat, duke u shprehur ngushëllimet më të sinqerta familjarëve dhe të afërmve të tyre. "Ngushëllimet e mia më të thella për familjet dhe të afërmit e viktimave të sulmit tragjik në Krakov", deklaroi ai përmes një mesazhi publik. Gjatë fjalës së tij, Tusk ka vlerësuar maksimalisht guximin e forcave të rendit, të cilat u hodhën në aksion duke rrezikuar drejtpërdrejt jetën e tyre për të vënë situatën nën kontroll. "Respekti më i lartë për policët heroikë, të cilët vepruan duke rrezikuar jetën e tyre", tha Tusk, duke shtuar se reagimi i tyre ishte i menjëhershëm. Në të njëjtën kohë, shefi i ekzekutivit i ka drejtuar një thirrje të prerë klasës politike, duke kërkuar që ngjarja tragjike të mos shërbejë si terren për përplasje dhe kalkulime elektorale apo partiake. "Mos e përdorni këtë tragjedi për lojëra politike. Do t’i sqarojmë të gjitha rrethanat e këtij krimi", theksoi ai. Si pasojë e përballjes gjatë ndërhyrjes, tre efektivë të policisë mbetën të plagosur, ndërsa gjendja e njërit prej tyre mbetet kritike. Për këtë arsye, Tusk bëri thirrje për solidaritet mbarëkombëtar. "Tre prej tyre u plagosën, ndërsa njëri po lufton për jetën. Ata kanë nevojë për lutjet tona, solidaritetin dhe mbështetjen e plotë", shtoi kryeministri polak.