Tragjedi në Krakov: Të shtëna me breshëri në qendër të qytetit, lënë pas 6 të vdekur dhe dhjetëra të plagosur

Një ngjarje e rëndë ka tronditur pasditen e së shtunës qytetin e Krakovit në Poloni, ku gjashtë persona humbën jetën dhe 16 të tjerë mbetën të plagosur, pasi një person i armatosur hapi zjarr nga automjeti i tij në drejtim të turmës. Ngjarja ndodhi në Sheshin Kryesor, një nga zonat turistike më të frekuentuara të vendit, ndërsa Ministri polak i Mbrojtjes, Wladyslaw Kosiniak-Kamysz, e ka cilësuar ngjarjen si një "akt terrori" të drejtuar ndaj banorëve dhe vizitorëve. Sipas autoriteteve policore, sulmi u regjistrua pak pas orës 15:00, kur autori hyri në shesh nga rruga Slawkowska i pajisur me një veturë me ngjyrë të zezë. Pa zbritur nga automjeti, ai filloi të qëllonte pa dallim mbi qytetarët, duke shkaktuar viktima që në hyrje të sheshit dhe duke vazhduar terrorin gjatë lëvizjes në disa pika të ndryshme të qendrës historike. Bilanci tragjik flet për katër gra dhe dy burra të vrarë, ndërsa mes të plagosurve figurojnë edhe dy efektivë policie, gjendja e njërit prej të cilëve është serioze. Deri në mbrëmjen e së shtunës, autoritetet nuk kishin publikuar ende identitetin dhe kombësinë e viktimave. Në vendngjarje u sekuestrua një arsenal armësh dhe një pushkë automatike e tipit AR-15, e cila u përdor në sulm. Autori, një 25-vjeçar me shtetësi polake dhe i veshur me uniformë kamuflazhi ushtarak, u neutralizua nga policia pas një shkëmbimi zjarri në kryqëzimin e rrugëve Stradomska dhe Dietla. Pasi u plagos, ai u dërgua në spital ku iu nënshtrua ndërhyrjes kirurgjikale dhe aktualisht ndodhet në gjendje të qëndrueshme shëndetësore. Zëdhënësja e policisë, Katarzyna Cislo, konfirmoi se sulmuesi ka vepruar i vetëm dhe se rreziku për qytetarët ka kaluar, duke hedhur poshtë çdo spekulim në rrjetet sociale për ekzistencën e një bashkëpunëtori në arrati. Ministri i Brendshëm, Marcin Kierwinski, gjatë një konference për shtyp bëri të ditur se të dhënat paraprake tregojnë se autori ishte i ndikuar nga ideologji të ekstremit të djathtë, me bindje thellësisht radikale dhe ultranacionaliste. Ndërkohë, lidhur me pretendimet e qarkulluara në internet se sulmuesi mund të ketë shërbyer në radhët e ushtrisë, ministri Kosiniak-Kamysz sqaroi prerazi se ai nuk ka pasur asnjëherë lidhje me forcat e armatosura polake. Grupet hetimore po hetojnë gjithashtu burimin e pajisjes me armë dhe lidhjet e mundshme me qarqe ekstremiste. Kryeministri Donald Tusk, i cili po ndjek nga afër situatën përmes raporteve të vazhdueshme nga ministri i Brendshëm, thirri gjatë mbrëmjes një takim emergjent me krerët e sigurisë dhe ministrat. Nga ana e tij, kryetari i Bashkisë së Krakovit, Lukasz Gibala, shpalli ditë zie zyrtare në qytet deri më 11 nëntor. Reagime solidarizuese kanë ardhur edhe nga ndërkombëtarët. Ambasadori i Shteteve të Bashkuara në Poloni, Tom Rose, e dënoi ashpër sulmin mizor që cënoi qetësinë e vendit, ndërsa qeveri të ndryshme evropiane dërguan mesazhe ngushëllimi për popullin polak. Ngjarjet e kësaj natyre me përdorimin e armëve të zjarrit janë tejet të pazakonta në Poloni. Krakovi, si metropoli i dytë më i madh i vendit, pret çdo vit rrafsh 15 milionë turistë, të cilët zakonisht e vizitojnë pikërisht Sheshin Kryesor, që njihet si sheshi mesjetar më i madh në të gjithë kontinentin evropian.