Gara për kreun e PDK-së: A do të kandidojë Mërgim apo Sami Lushtaku?

Deputeti i Partisë Demokratike të Kosovës, Mërgim Lushtaku, nuk e ka mbyllur përfundimisht derën për një kandidaturë të mundshme në krye të kësaj force politike, pavarësisht se deri më tani shfaqet më i rezervuar ndaj një hapi të tillë. Parlamentari i njohur ka bërë të ditur se i janë drejtuar thirrje të shumta nga qytetarët dhe strukturat e partisë që të garojë, mirëpo thekson se ende nuk ka sjellë një vendim përfundimtar. Ai ka bërë të meket se hapi i ardhshëm do të peshohet pas bisedave me rrethin e tij të ngushtë, duke vënë në pah gjithashtu se formacioni politik ka nevojë për ripërtëritje dhe qasje të reja në procesin e zgjedhjes së kryetarit. “Kam pasur kërkesa të ndryshme nga qytetarë dhe bashkëpartiakë që t’i hyj garës, por deri tash s’kam ndonjë vendim që t’i hyj garës personalisht. Unë i konsultoj miqtë, shokët, dashamirët. Njeriu, nëse hyn në politikë dhe s’ka ambicie politike, qoftë edhe në pozitën e kryetarit, atëherë nuk është mirë të vazhdojë as në politikë. Është mirë që kemi ambicie nga anëtarët që tashmë kanë deklaruar kandidimin e tyre për kryetar”, është shprehur ai. Në lidhje me pikëpyetjet nëse figura qendrore e familjes, Sami Lushtaku, mund të hyjë në këtë garë drejtuese, deputeti ka vlerësuar se ai gëzon një peshë publike që shtrihet përtej kufijve të ngushtë partiakë, duke rikujtuar rrugëtimin e tij si ndër themeluesit e Ushtrisë Çlirimtare të Kosovës dhe bashkëpunimin e ngushtë me krerët historikë të subjektit. Sipas tij, Sami Lushtaku ka qenë krahu mbështetës i Hashim Thaçit dhe çdo lideri tjetër të PDK-së, sidomos në betejat zgjedhore, duke shtuar se sikur të kishte aspirata për të marrë drejtimin e partisë, ai do të ishte pjesë e garës. “Personat që kanë një autoritet publik përtej PDK-së, pasi dihet se ai ka qenë ndër themeluesit e UÇK-së bashkë me Adem Jasharin dhe të tjerë. Autoriteti është mbi partiak, sipas mendimit tim, dhe gjithmonë të tjerët kanë pretenduar se ka një ndikim më të madh sesa vetë kryetari. Kjo asnjëherë nuk ka qëndruar. Ka qenë krahu i djathtë i Hashim Thaçit me krenari dhe ka qenë krahu i djathtë i secilit kryetar kur ka pasur nevojë për mbështetje elektorale”, ka sqaruar ai. Kujtojmë se Partia Demokratike e Kosovës ka nisur procesin e zgjedhjeve të brendshme pas largimit nga detyra të ish-kryetarit Bedri Hamza. Aktualisht, drejtimin e partisë në cilësinë e ushtrueses së detyrës e mban Vlora Çitaku.