Tensionet në Qeverinë e Maqedonisë së Veriut: ZNAM kërcënon me largim për provimin e jurisprudencës në gjuhën shqipe

Lëvizja ZNAM, subjekt pjesë e koalicionit qeverisës në Maqedoninë e Veriut, ka shprehur kundërshtimin e saj të prerë ndaj mundësisë që provimi i jurisprudencës të zhvillohet në ndonjë gjuhë tjetër përveç asaj maqedonase. Kryetari i kësaj force politike, Maksim Dimitrievski, ka paralajmëruar se në rast se ekzekutivi miraton ndonjë vendim të ndryshëm nga ky qëndrim, partia e tij është plotësisht e gatshme të tërhiqet nga koalicioni qeveritar. Ndaj këtij qëndrimi ka reaguar menjëherë Aleanca për Shqiptarët, duke theksuar se Maksim Dimitrievski mund ta braktisë Qeverinë pasi është i vetëdijshëm për mundësinë e mbajtjes së zgjedhjeve të parakohshme parlamentare. Sipas këtij reagimi, çështja e provimit të jurisprudencës po përdoret nga ai si një mjet për fushatë politike. Në një takim të zhvilluar së fundmi me studentët, ministri i Drejtësisë, Jeton Shasivari, hodhi idejnë që 12 provime të jurisprudencës të mundësohen në gjuhën shqipe, ndërsa dy prej tyre në gjuhën maqedonase. “Parashikojmë të kërkojmë edhe një mendim brenda një afati të shkurtër nga Komisioni i Venecias, si organi më prestigjioz këshillëdhënës evropian për çështje kushtetuese dhe juridike”, u shpreh Jeton Shasivari, ministër i Drejtësisë i RMV-së. Nga ana e tij, profesori universitar Bashkim Selmani konsideron se autoritetet maqedonase po shfaqin mungesë vullneti për të arritur një kompromis rreth dhënies së provimit të jurisprudencës në gjuhën shqipe. Ai ka propozuar që institucionet e arsimit të lartë juridik të themelojnë një trup të posaçëm pedagogësh, i cili do të merrte përsipër realizimin e këtij procesi në gjuhën shqipe. “Do të ishte ideja pozitive dhe zgjidhëse për momentin që fakultetet e drejtësisë ta japin provimin e jurisprudencës në gjuhën shqipe dhe kjo do të ishte pjesa më përzgjedhëse, sepse një proces i këtillë i nivelit akademik dhe universitar nuk u pengon. Prandaj, u apeloj të gjitha fakulteteve të drejtësisë, tri fakulteteve, të zgjedhin një trup pedagogësh, të cilët do ta mundësonin dhënien e provimit të jurisprudencës në gjuhën shqipe”, u shpreh profesor Selmani. Vlen të theksohet se që nga shpallja e pavarësisë së Maqedonisë së Veriut, provimi i jurisprudencës në këtë shtet nuk është zhvilluar asnjëherë në gjuhën shqipe.