Zëri i shqiptarëve në Teksas: Protestë në Austin në mbrojtje të vlerave të UÇK-së

Komuniteti shqiptar që jeton në Teksas ka organizuar një tubim protestues para godinës së Kapitolit në Austin. Qëllimi i kësaj proteste ishte shprehja e pakënaqësisë lidhur me vendimin e Dhomave të Specializuara në Hagë ndaj katër ish-krerëve të Ushtrisë Çlirimtare të Kosovës, duke rikonfirmuar njëkohësisht mbështetjen e palëkundur për luftën çlirimtare të Kosovës. Të pranishmit në këtë organizim u shfaqën me flamuj të Shteteve të Bashkuara të Amerikës, Kosovës dhe Shqipërisë. Përmes pankartave të shumta, ata përcollën mesazhe të fuqishme si “Not in My Name” (Jo në emrin tim) dhe “Freedom Has a Name: UÇK” (Liria ka emër: UÇK). Në podiumin e kësaj proteste u dëgjuan fjalimet e figurave të shquara të komunitetit, përfshirë kryetarin e Komunitetit Shqiptaro-Amerikan në Teksas, Visar Visoka, veteranin e UÇK-së, Ekrem Hyseni, si dhe ish-kryetarin e komunitetit, Nazar Mehmeti. Po ashtu, fjalën e morën edhe Bruno Ceka, Ruzhdi Halili, Agim Halili, si dhe zëvendëskryetari i Bashkisë së Wylie, Gino Mulliqi. Gjatë fjalimeve të tyre, pjesëmarrësit e cilësuan verdiktin e Gjykatës Speciale si të padrejtë. Ata shprehën bindjen e tyre se procesi i apelimit do të sjellë drejtësi, ndërsa bënë thirrje për një bashkërendim më të mirë të faktorit politik shqiptar, si në Kosovë ashtu edhe në diasporë, me qëllim mbrojtjen e vërtetësisë së historisë së luftës së lavdishme çlirimtare.