Azizi i prerë: Provimi i jurisprudencës do të zhvillohet në shqip, për të drejtat tona vendos VLEN-i

Deputeti i koalicionit VLEN, Adnan Azizi, ka reaguar ashpër ndaj qëndrimeve të partisë ZNAM, e cila ka paralajmëruar largimin nga ekzekutivi në rast se provimi i jurisprudencës mundësohet të jepet edhe në gjuhën shqipe. Sipas Azizit, kërcënimet e tilla nuk përbëjnë ndonjë peshë reale, ndërsa ka sjellë në vëmendje rastin e shkarkimit të ministrit Filkov, për të cilin zyrtarët e ZNAM-it kishin garantuar se nuk do të ndodhte kurrë. Ai ka qenë i vendosur se ky proces provimi do të jetë i qasshëm në gjuhën shqipe, duke mos marrë parasysh aspak kundërshtimet e ardhura nga radhët e ZNAM-it. "Për të drejtat e shqiptarëve pyetet VLEN-i e jo ZNAM-i", u shpreh Azizi, duke shtuar se retorika e tyre nxitëse nuk ka fuqi të kthejë në jetë një subjekt politik që tashmë gjendet në agoni politike.