Industria e mbrojtjes: Nisin punimet për fabrikën e parë të municionit në Gjakovë

Kanë nisur zyrtarisht punimet e para në fshatin Jahoc të Gjakovës për ngritjen e një prej iniciativave më strategjike të industrisë së mbrojtjes në vend. Plani zyrtar i Ministrisë së Mbrojtjes parasheh që cikli i parë i prodhimit testues të municioneve me vulën “Made in Kosova” të jetë funksional deri në përmbyllje të këtij viti. Megjithatë, rruga drejt operimit të plotë të këtij kompleksi mbart sfida komplekse që shkojnë përtej aspektit thjesht ndërtimor. Përveç ngritjes së infrastrukturës fizike, procesi kërkon përmbushjen e kritereve strikte ligjore, procedurave administrative, vendosjen e teknologjisë së avancuar, përgatitjen e kuadrit profesional dhe respektimin e standardeve ndërkombëtare të sigurisë. Këto sfida komplekse, sipas analistëve të fushës, lënë vend për dyshime nëse testet e para të prodhimit do të mund të realizohen brenda afateve kohore të shpallura paraprakisht. Në terrenin ku është përcaktuar të ndërtohet kompleksi industrial në Jahoc të Gjakovës, tashmë ka nisur lëvizja e mjeteve të rënda dhe angazhimi i ekipeve punëtore për gërmimet dhe ndërhyrjet e para përgatitore, duke shënuar hapin e parë konkret drejt themelimit të fabrikës së parë të municioneve në territorin e Kosovës. Burime zyrtare nga Ministria e Mbrojtjes kanë bërë të ditur se e gjithë dinamika e punës po ecën në përputhje të plotë me marrëveshjen bilaterale të lidhur me korporatën shtetërore turke të mbrojtjes, MKE. "Punimet për realizimin e projektit të fabrikës së municioneve kanë filluar dhe janë duke vazhduar sipas marrëveshjes së nënshkruar me kompaninë shtetërore turke MKE. Sipas afateve të parapara, pritet që deri në fund të këtij viti të fillojë prodhimi i parë testues i municioneve ‘Made in Kosova’. Ky projekt nuk përfshin vetëm ndërtimin e një fabrike, por krijimin e një kompleksi industrial të prodhimit të municioneve, me infrastrukturë mbështetëse, laboratorë testimi dhe kalibrimi, depo dhe objekte të tjera të nevojshme për funksionimin e tij”, ka deklaruar Liridona Gashi, shefe e kabinetit në këtë ministri. Pavarësisht optimizmit institucional, eksperti i çështjeve të sigurisë, Hysen Gecaj, vlerëson se afati i dhënë për nisjen e prodhimit brenda vitit është tejet optimist dhe vështirë i arritshëm. “Nuk e besoj që mund të arrihet për kaq kohë të shkurtër që të fillohet me prodhimin e municioneve. Është e pamundur. Ne nuk kemi një ligj të miratuar nga Kuvendi i Kosovës për municionet ushtarake”, u shpreh Gecaj. Nga ana tjetër, njohësi tjetër i sigurisë, Arben Dashevci, konsideron se ngadalësimet e mundshme në ecurinë e projektit lidhen ngushtësisht me burokracinë dhe harmonizimin e akteve juridike mes dy shteteve. “Këto vonesa definitivisht i shoh si aspekte procedurale ose administrative ndërmjet dy shteteve, sepse është partneritet i Republikës së Turqisë, në këtë rast i një fabrike shumë serioze për prodhimin e municioneve, dhe Kosovës”, theksoi Dashevci. Krahas punimeve në infrastrukturë, dikasteri i mbrojtjes kishte ndërmarrë hapa konkretë muaj më parë edhe për thithjen e burimeve njerëzore, duke hapur procesin e konkurrimit për profile të ndryshme profesionale që do t'i shërbejnë këtij kompleksi. Në muajin dhjetor bëhen dy vjet plota qëkur Qeveria e Kosovës dhe gjiganti shtetëror turk MKE kanë zyrtarizuar paktin për ndërtimin e kësaj fabrike, ku fillimisht ishte premtuar se prodhimi do të niste në fund të dhjetorit. Pas dy viteve pritje, sërish mbetet për t'u parë nëse ky afat i ri do të përmbushet.