Tragjedia në Krakov: Liderët botërorë dënojnë ashpër sulmin e armatosur në Poloni që la pas gjashtë të vdekur

Reagime të forta dhe valë ngushëllimesh kanë përfshirë skenën ndërkombëtare pas ngjarjes së rëndë të regjistruar në Krakov të Polonisë, ku një sulm me armë zjarri i ka marrë jetën gjashtë personave dhe ka lënë të plagosur afërsisht dymbëdhjetë të tjerë. Sipas autoriteteve policore polake, incidenti nisi rreth orës 15:00, kur një person hyri me automjet në një shesh publik dhe nisi të qëllojë në mënyrë të verbër ndaj qytetarëve. Mes personave të plagosur në këtë ngjarje tragjike përfshihen edhe disa efektivë policie. Presidenti i Ukrainës, Volodymyr Zelensky, ishte ndër zyrtarët e parë që reagoi, duke e cilësuar këtë akt si një krim tronditës. “Në emër të popullit ukrainas dhe personalisht, u shpreh ngushëllimet e mia të sinqerta familjeve dhe të afërmve të viktimave. Nuk mund të ketë asnjë justifikim për këtë sulm dhe besojmë se autori do të përballet me drejtësinë”, u shpreh ai. Ndërkohë, presidenti i Letonisë, Edgars Rinkēvičs, e quajti ngjarjen një lajm të tmerrshëm, duke përcjellë ngushëllimet e tij për familjarët dhe miqtë e viktimave. Nga ana e tij, kryeministri i Republikës Çeke, Andrej Babiš, theksoi se mendimet e tij janë pranë viktimave dhe familjeve të tyre, ndërsa u uroi shërim të shpejtë të lënduarve. “Shpreh mbështetjen time të plotë për Poloninë dhe kryeministrin Donald Tusk në këtë kohë të vështirë”, tha ai. Presidenti i Lituanisë, Gitanas Nausėda, shprehu trishtimin e tij të thellë për të shtënat, duke shtuar se shteti lituanez qëndron në solidaritet të plotë me popullin polak. Ministri i Jashtëm i Estonisë, Margus Tsahkna, po ashtu u shpreh i tmerruar nga ky lajm, duke theksuar se mbështetja e tij morale është me të gjithë të prekurit nga kjo tragjedi. Presidenti i Sllovakisë, Peter Pellegrini, tha se sulmuesi i dha fund jetëve të pafajshme dhe shkaktoi një dhimbje të jashtëzakonshme për komunitetin dhe familjarët. “Dhuna dhe urrejtja nuk kanë vend në shoqëritë tona”, deklaroi ai. Mesazhe solidariteti mbërritën edhe nga Hungaria, ku kryeministri Péter Magyar u shprehu ngushëllime miqve polakë, duke ritheksuar se Hungaria qëndron përkrah Polonisë. Ambasadori i Shteteve të Bashkuara të Amerikës në Poloni, Tom Rose, e cilësoi ngjarjen si një sulm të egër dhe vrasës që ka cënuar paqen e vendit. “Amerika qëndron me Poloninë në këtë orë të errët”, u shpreh ai. Një qëndrim të ngjashëm ndau edhe ambasadorja britanike në Poloni, Melinda Simmons, e cila tha: “Mbretëria e Bashkuar qëndron pranë Polonisë”. Kryediplomatja e Bashkimit Evropian, Kaja Kallas, theksoi se Polonia nuk është vetëm dhe se kjo tragjedi në Krakov do të lërë plagë që shtrihen përtej kufijve kombëtarë. Presidentja e Parlamentit Evropian, Roberta Metsola, u shpreh e pikëlluar nga të shtënat në një pasdite që duhet të kishte qenë e qetë, ndërsa falënderoi policinë dhe ekipet e emergjencës për reagimin e shpejtë dhe vënien e situatës nën kontroll. “Qëndro i fortë, Krakov”, u shpreh ajo. Në lidhje me këto zhvillime, ministri i Jashtëm i Polonisë, Radosław Sikorski, bëri të ditur se ka pranuar dhjetëra mesazhe ngushëllimi nga homologë anembanë botës. “Miliona njerëz nga e gjithë bota që kanë vizituar Sheshin Kryesor të Tregut në Krakov e ndiejnë dhimbjen tonë veçanërisht thellë dhe po qëndrojnë me ne në solidaritet”, deklaroi Sikorski.