Identifikohen dy trupa të zhdukur, konfirmohet se nuk bëjnë pjesë në 'Grupin e Intelektualëve'

Komisioni Qeveritar për Personat e Zhdukur ka njoftuar se procesi i identifikimit të mbetjeve mortore ka rezultuar me konfirmimin e identitetit të dy personave. Lajmi është bërë i ditur nga përfaqësuesi i këtij institucioni, Kushtrim Gara. Në deklaratën e tij, Gara ka sqaruar se këta dy persona nuk kanë lidhje me të ashtuquajturin “Grupi i Intelektualëve”, për të cilët kohët e fundit janë zhvilluar gërmime intensive në zonën e Zubin-Potokut. Tutje, ai ka bërë të ditur se gjetjet në fjalë nuk janë rezultat i punimeve në veri të vendit, por rrjedhojë e hulumtimeve të kryera në një lokacion tjetër, duke sqaruar kështu konfuzionin e mundshëm lidhur me vendndodhjen e gjetjeve.