Kriza politike në Izrael: Netanyahu lëshon akuza të forta ndaj partive arabe dhe kërkon qeveri uniteti

Kryeministri i Izraelit, Benjamin Netanyahu, ka ashpësuar retorikën e tij ndaj opozitës, duke hedhur akuza të forta drejt partive arabe dhe duke bërë thirrje urgjente për krijimin e një kabineti të unitetit kombëtar nën udhëheqjen e partisë Likud. Duke folur për situatën politike, Netanyahu u bëri thirrje forcave të krahut kombëtar dhe partive sioniste që t'i bashkohen një qeverie të gjerë qeverisëse. “Ekziston një qeveri që mund ta përballojë këtë sfidë, një qeveri e gjerë kombëtare nën udhëheqjen e Likud, me mua në krye, në të cilën do të marrin pjesë të gjitha forcat e kampit kombëtar dhe të gjitha partitë sioniste që dëshirojnë të bashkohen”, u shpreh ai. Këto deklarata vijnë në prag të vendimit që Presidenti izraelit, Isaac Herzog, pritet të marrë këtë të diel lidhur me mandatin për krijimin e ekzekutivit të ri. Në këtë kontekst, Netanyahu paralajmëroi se një kabinet që mbështetet nga partitë arabe, të cilat ai i cilësoi si “mbështetëse të terrorizmit”, do të rrezikonte seriozisht sigurinë kombëtare. “Jo vetëm që një qeveri e tillë nuk do të ishte në gjendje të luftonte armiqtë tanë, por do na shkatërronte edhe nga brenda”, theksoi kreu i qeverisë së përkohshme, duke shtuar se vetë ekzistenca e vendit është në pikëpyetje. Pozita e Netanyahut vjen në një periudhë tejet të ndjeshme, pasi blloku i tij numëron 53 mandate në Knesset, duke qenë tetë vende larg shumicës prej 61 deputetësh. Nga ana tjetër, partitë hebraike të opozitës kanë 48 ulëse, ndërsa ato arabe zotërojnë 19 mandate, çka i shndërron në një element kyç në balancat parlamentare. Ndërkohë, Gandhi Eisenkot ka siguruar mbështetjen e 67 ligjvënësve për të marrë mandatin qeverisës, megjithëse kjo nuk garanton domosdoshmërisht një koalicion funksional. Ai ka përjashtuar çdo mundësi të përfshirjes së partive arabe në administratën e tij, duke kufizuar kështu alternativat e tij. Për sa kohë që qeveria e ja re nuk është formuar, Netanyahu vazhdon të mbajë detyrën e kryeministrit të përkohshëm, ndërsa skenari i një bllokimi të zgjatur politik mbetet i hapur. Në fjalën e jo, lideri izraelit i lidhi zhvillimet e brendshme me rreziqet gjeopolitike, duke përmendur Iranin dhe aleatët e tij. “Islami radikal është sfida që po i copëton vendet sot në Evropë. Është sfida që na kërcënon edhe ne. Na kërcënon nga jashtë, përmes Iranit dhe aleatëve të tij, dhe nga brenda, përmes partive islamike që mbështesin terrorizmin”, u shpreh ai. Ai akuzoi forcat politike arabe se synojnë të cënojnë identitetin hebraik të shtetit dhe aftësinë mbrojtëse të tij, duke shtuar se një qeveri e varur prej tyre nuk do të mund t'i bëjë ballë sfidave të jashtme. Në mbyllje, Netanyahu kritikoi ashpër liderët e opozitës, duke i akuzuar se po vendosin ambiciet personale dhe partiake mbi interesat e shtetit, ndërsa tentojnë të ngrenë një qeveri minoritare.