Superliga e volejbollit për femra: Tirana ndal Teutën dhe e kap në krye, triumfojnë edhe Dinamo e Skënderbeu

Teuta ka regjistruar humbjen e parë për këtë edicion në kampionat, pasi është mposhtur me rezultatin 3-2 në palestrën “Fahrie Hoti” nga Tirana. Ky rezultat bën që të dyja këto formacione të numërojnë tashmë nga 16 pikë, duke bashkëkryesuar renditjen e përgjithshme në Superligën e volejbollit për femra. Spektakli dhe rivaliteti ishin në nivele të larta, me skuadrat që luftuan ashpër për çdo top (25-17, 22-25, 25-22, 21-25, 15-13). Dueli dhuroi emocione deri në sekondat e fundit, ku më të saktë u treguan vajzat bardheblu të drejtuara nga trajneri Gorenxa. Ndërkohë, Dinamo ka shijuar suksesin e parë sezonal, duke mposhtur pastër 3-0 Vllazninë në transfertën e Shkodrës (25-23, 25-22, 25-11). Vendasit treguan rezistencë në dy fraksionet e para, por kryeqytetaset vendosën diktatin në momentet vendimtare, duke arkëtuar pikët e plota me meritë. Një paraqitje mjaft komode ka regjistruar edhe Skënderbeu, që ka mposhtur me shifrat 3-0 (24-13, 25-15, 25-19) Lushnjën në një sfidë të zhvilluar në kryeqytet. Ndeshja pati një drejtim të vetëm, ku volejbollistet korçare dominuan qartësisht kundërshtaret nga Myzeqeja. Kampiones në fuqi, Pogradecit, i është dashur të djersitë për të marrë një fitore të vështirë 3-0 në shtëpi ndaj Partizanit (26-24, 25-22, 25-19). Përballja pati rivalitet të theksuar sidomos në dy setet hapëse, por të kuqet nuk ia dolën të përballojnë ritmin deri në fund, duke bërë që liqenoret të ngjiten në shkallën e tretë të podiumit. Superliga-Femra, java e 6-të Pogradeci – Partizani, 3-0 Renditja: Teuta 16 pikë, Tirana 16 pikë, Pogradeci 15 pikë, Skënderbeu 13 pikë, Partizani 6 pikë, Dinamo 3 pikë, Lushnja 3 pikë, Vllaznia 0 pikë. Kategoria e Parë-Femra, java e 6-të Apolonia – Flamurtari, 3-0 Renditja: Studenti 18 pikë, Apolonia 12 pikë, Flamurtari 10 pikë, Elbasani 6 pikë, Korabi 5 pikë, Mirdita 3 pikë.