Dortmundi shmang rrezikun ndaj skuadrës revelacion dhe merr fitoren e radhës në Gjermani

Borussia e Dortmundit ka arkëtuar tri pikë vendimtare në përballjen kundër Elversbergut, skuadrës që po prodhon surpriza këtë edicion në futbollin gjerman, duke e mbyllur takimin e javës së nëntë me triumfin 2:1. Skuadra e njohur si verdhezi e ndërtoi suksesin e saj në një fraksion të dytë të ndeshjes mjaft dinamik, ku u regjistruan edhe të gjitha realizimet e këtij takimi. Zhvillohej minuta e 55-të kur epërsia i kaloi gjigantit gjerman. Fabio Silva ndërtoi një aksion duke i shërbyer Nmechas pranë zonës së rreptë, i cili gjeti hapësirën e duhur dhe me një goditje të saktë nga 18 metra shtyu topin në rrjetë për 1:0. Pak më vonë, në minutën e 71-të, i njëjti protagonist, Nmecha, vulosi dopietën e tij dhe të ekipit. Pas një topit të larguar nga Rohr, mesfushori provoi fatin nga afro 22 metra dhe përmes një gjuajtjeje fantastike realizoi në këndin e djathtë të portës kundërshtare për shifrat 2:0. Megjithatë, mysafirët nga Elversbergu treguan karakter duke ngushtuar disavantazhin në minutën e 81-të. Pas një ekzekutimi të shkurtër nga goditja e këndit në të majtë, Le Joncour asistoi në zonë te Futkeu, i cili u tregua i saktë për 2:1. Megjithë hovin e miqve deri në sekondat e fundit, Dortmundi menaxhoi me kujdes rezultatin dhe ruajti epërsinë minimale deri në vërshëllimën përfundimtare. Falë këtij rezultati pozitiv, Borussia e Dortmundit ngjitet përkohësisht në vendin e dytë me gjithsej 21 pikë të grumbulluara, ndërsa Elversbergu pozicionohet në vendin e shtatë me 13 pikë në llogarinë e vet.