Pas humbjes nga Partizani, trajneri Qatip Osmani analizon mangësitë e Laçit: Na mungon kreativiteti dhe lëvizja

Laçi ka regjistruar një tjetër rezultat negativ në kampionat, pasi u mposht në shtëpi me rezultatin minimal 0-1 nga Partizani, në takimin e vlefshëm për javën e 11-të të "Abissnet Superiore". Gjatë fjalës së tij për mediat pas përfundimit të sfidës, trajneri i skuadrës kurbinase, Qatip Osmani, ka analizuar arsyet e këtij dështimi, duke u ndalur te problemet në fazën sulmuese. Strategu i bardhërinjve nuk e ka fshehur shqetësimin për mënyrën se si skuadra e tij menaxhon ndeshjet përballë kundërshtarëve me forcë të madhe sulmuese. Sipas tij, Laçi vuan ndjeshëm ndaj ekipeve që kanë një ofensivë efikase, ndërkohë që theksoi se mungesa e krijimtarisë dhe pasiviteti i lojtarëve me topin në këmbë mbeten ngërçi kryesor. Osmani vuri në dukje se pozicionimi i shumicës së lojtarëve në një vijë e ka bërë shumë të lehtë detyrën për mbrojtjen kundërshtare që t'i neutralizojë. Ai shtoi se ekipi ka shfaqur një lojë të plogësht, statike dhe të ngadaltë, ku tentativat e pakta nga distanca janë bllokuar lehtësisht nga lojtarët e Partizanit. Duke analizuar aspektin taktik, trajneri shtoi se gjatë pjesës së parë kishte kërkuar nga të besuarit e tij që të luanin më shumë me topa në tokë, për të shfrytëzuar faktin se kryeqytetasit luanin me tre mbrojtës dhe ishin të fortë në dyluftimet ajrore. Megjithatë, ai pranoi se skuadra nuk arriti t'i zbatojë si duhet këto udhëzime dhe se situata e krijuar në fushë la shumë për to dëshiruar.