Paradoksi i mjekësisë: Specialistët mbeten jashtë sistemit publik, ndërsa listat e pritjes zgjaten pafund

Specialisti i Oftalmologjisë, Samir Bytyçi, ka adresuar një shqetësim të rëndë drejtuar ministrit të Shëndetësisë, Arben Vitia, dhe rektorit të Universitetit të Prishtinës, Arben Hajrullahu. Ai vë në dukje një mungesë të theksuar të koordinimit institucional, që sipas tij, po e pengon angazhimin e tij profesional brenda sistemit shëndetësor publik. Në një letër të hapur, Bytyçi bën të ditur se kanë kaluar gjashtë vjet që nga përfundimi i specializimit në fushën e Oftalmologjisë, ndërkohë që ai është pjesë e stafit akademik të Universitetit të Prishtinës si asistent i rregullt tash e 15 vjet. Pavarësisht këtyre kualifikimeve, ai vazhdon të mbetet jashtë angazhimit praktik në spitalet publike. Duke e cilësuar këtë situatë si një paradoks të pashpjegueshëm administrativ, Bytyçi pyet se si është e mundur që një mjek të vlerësohet i aftë për të ligjëruar dhe trajnuar gjeneratat e reja të mjekëve, por të konsiderohet i papërshtatshëm për të ofruar shërbime klinike apo për të kryer operacione në Klinikën e Oftalmologjisë. Ai ka tërhequr vërejtjen edhe për sfidën e listave të gjata të pritjes së pacientëve, duke nënvizuar se në një kohë kur qytetarët presin me muaj apo vite për trajtim, specialistët e kualifikuar po lihen në margjina. Bytyçi shton se retorika zyrtare për ndalimin e largimit të mjekëve nga vendi është në shpërputhje të plotë me realitetin e hidhur brenda institucioneve shëndetësore. Sipas specialistit, burokracia e tepruar dhe neglizhenca në bashkëpunimin mes Ministrisë së Shëndetësisë dhe Universitetit të Prishtinës janë shkaktarët kryesorë të kësaj situate. Ai ka theksuar se kërkesa e tij nuk ka për qëllim marrjen e ndonjë privilegji, por realizimin e të drejtës ligjore dhe profesionale për të shërbyer aty ku pacientët kanë nevojë më së shumti: në shëndetësinë publike.