Demonstrim force në Podgoricë: Otrant-Olympic mposht Buduçnostin dhe merr kreun e tabelës

Formacioni shqiptar nga Ulqini, Otrant-Olympic, ka realizuar një paraqitje fantastike në transfertë ndaj Buduçnostit të Podgoricës, duke fituar bindshëm me shifrat 4:1 në kuadër të sfidës kryesore të javës së 15-të në elitën e futbollit të Malit të Zi. Përmes një dominimi të plotë në tokën kundërshtare, skuadra ulqinake ka konfirmuar se është një nga pretendentët kryesorë për trofeun e kampionit në këtë edicion. Përpjekja e parë e rrezikshme nga mysafirët u regjistrua që në minutën e 7-të. Pas një krosimi të prodhuar nga Anxhello Rudoviq, Alban Taipi pati një mundësi të artë, por gjuajtja e tij kreu rrugën mbi kuadratin e portës vendase. Zhvillimet në fushë u zhbllokuan nga lojtarët e Otrantit. Konkretisht, në minutën e 29-të, Filip Paviçeviq përfitoi nga asistimi i Anxhello Rudoviqit për të zhbllokuar rezultatin dhe kaluar skuadrën e tij në avantazh 0:1. Dominimi i ulqinakëve u konkretizua sërish në minutën e 40-të, kur Halil Muharemoviq shfrytëzoi në perfeksion një top të pasuar në thellësi, duke dyfishuar shifrat në 0:2. dhe duke thelluar epërsinë e skuadrës së tij. Vendasit e Buduçnostit gjetën forcë të reagojnë në çastet e fundit të fraksionit të parë, teksa Ivan Bullatoviq shënoi në minutën e parë shtesë të pjesës së parë, duke ngushtuar rezultatin në 1:2 dhe rihapur shpresat për vendasit. Megjithatë, përgjatë 45 minutave të dyta, Otrant-Olympic menaxhoi mjaft mirë lojën. Pas disa rasteve të shpërdoruara, futbollisti i futur nga stolit, Armin Boshnjak, shënoi në minutën e 73-të për të çuar epërsinë në 1:3. Epilogun dhe triumfin madhështor të skuadrës nga Ulqini e vulos përfundimisht Anxhello Rudoviq në minutën e 80-të, i cili shënoi golin e katërt për t'i dhënë vulën rezultatit përfundimtar 1:4. Falë këtij rezultati madhështor, Otrant-Olympic ngjitet zyrtarisht në pozicionin e parë të renditjes me 27 pikë të grumbulluara, ndërkohë që Buduçnosti mbetet i kuotuar me 25 pikë.