Bilanci i rëndë i ekzekutivit: AAK rendit dështimet, milionat për rrymë dhe skandalet në diplomaci

Aleanca ka ashpërsuar tonet ndaj qeverisjes aktuale, duke e akuzuar për shkelje të rënda institucionale, keqmenaxhim financiar, nepotizëm të hapur dhe mungesë totale të llogaridhënies para qytetarëve. Përmes një reagimi zyrtar në rrjetet sociale, kjo forcë politike ka theksuar se Kosova po e mbyll edhe një javë tjetër nën hijen e degradimit institucional, ku pasojat e dështimeve qeveritare po bien drejtpërdrejt mbi shpatullat e qytetarëve. Vëmendje e veçantë i është kushtuar rikthimit të reduktimeve të energjisë elektrike në disa rajone të vendit, pavarësisht se janë derdhur miliona euro për sigurimin e importit të rrymës. Sipas të dhënave të publikuara në reagim, brenda vetëm pesë ditëve pune janë paguar mbi 11 milionë euro për energji të importuar, ndërkohë që popullata po përballet sërish me ndërprerje të furnizimit dhe me paralajmërime për rritje të çmimit të tarifave. Një tjetër shqetësim i ngritur lidhet me zhvillimet në shërbimin e jashtëm, të cilat janë cilësuar si nepotizëm i pastër partiak. AAK ka përmendur dërgimin e familjarëve të zyrtarëve të lartë shtetërorë në misione diplomatike, duke e lidhur këtë edhe me deklaratën e ministrit të Jashtëm, Glauk Konjufca, se listat e emërimeve i vijnë për nënshkrim pa kaluar një filtër paraprak shqyrtimi. Kritika të ashpra janë adresuar edhe ndaj deputetëve të Lëvizjes Vetëvendosje në Kuvend, të cilët akuzohen se i janë shmangur llogaridhënies gjatë shqyrtimit të gjetjeve nga Raporti i Auditorit të Përgjithshëm, si dhe për bllokimin e raportimit në Komisionin Hetimor Parlamentar për Zyrën e Kryeministrit. Në të njëjtin kontekst, është përmendur edhe Raporti i Progresit nga Bashkimi Evropian, duke vënë njoftimin në pah mungesën e reformave dhe rezultateve në sistemin e drejtësisë, krahas vërejtjeve të ashpra për luftimin e korrupsionit të nivelit të lartë. Po ashtu, Aleanca ka trajtuar protestat e zhvilluara në Prishtinë pas vrasjes tragjike të Arlinda Zekajt në Pejë, duke kërkuar llogaridhënie institucionale dhe duke dënuar heshtjen e krerëve të shtetit përballë thirrjeve qytetare për dorëheqjen e ministrave Xhelal Sveçla dhe Donika Gërvalla. Përmbyllja e reagimit thekson se shpërfillja dhe mungesa e reagimit nga ana e liderëve shtetërorë dëshmon qartë se ky pushtet ka humbur çdo ndjeshmëri dhe legjitimitet për të drejtuar vendin.