Dramë në minutat e fundit: Feronikeli ’74 trondit Ballkanin në Superligë

Feronikeli ’74 ka arkëtuar tri pikë tejet të çmuara në kuadër të xhiros së 13-të në elitën e futbollit kosovar, pasi ka mposhtur kampionët në fuqi, Ballkanin, me shifrat minimale 1-0. Forma pozitive e skuadrës nga Drenasi po vazhdon, ku pas triumfit ndaj Dukagjinit dhe barazimit me Malishevën, tani ka regjistruar një tjetër rezultat të madh ndaj njërit prej pretendentëve kryesorë për titullin kampion. 45-minutëshi i parë u zhvillua nën shenjën e rivalitetit të lartë dhe një loje të barabartë, ku të dyja palët provuan portën kundërshtare, mirëpo pa sukses në finalizim gjatë kësaj pjese. Intensiteti u ruajt edhe në pjesën e dytë me raste shënimi nga të dy krahët, por ishin nikoqirët ata që treguan më shumë përqendrim dhe dëshirë për ta kërkuar fitoren deri në sekondat e fundit. Kur ndeshja po i afronte çastet e fundit dhe po shkonte drejt një barazimi pa gola, në skenë doli Ibrahim Cërvadiku. Në minutat shtesë, ai realizoi një gol vendimtar që i dha Feronikelit ’74 fitoren e madhe 1-0. Falë këtij rezultati pozitiv, Feronikeli ’74 ngjitet përkohësisht në vendin e shtatë me kuotën e 15 pikëve, derisa Ballkani mbetet i pozicionuar në vendin e katërt me 19 pikë të tubuara. Në sfidën e ardhshme kampionale, Feronikeli ’74 do të udhëtojë për të u përballur me Dritën, ndërsa Ballkani do të kërkojë këndvështrimin te ndeshja vendase kundër Gjilanit.