Skema e paprecedentë në New York: Përdorën inteligjencën artificiale për të grabitur 129 milionë dollarë

Autoritetet në Shtetet e Bashkuara të Amerikës kanë vënë në pranga tre persona, të cilët dyshohen se kanë shfrytëzuar inteligjencën artificiale për të kopjuar identitetin e drejtuesve të korporatave dhe profesionistëve ligjorë, duke realizuar kështu një mashtrim milionësh që kap shifrën e 129 milionë dollarëve. Sipas dokumenteve të siguruara nga gjykata federale në New York, operacioni kriminal ka zgjatur për më shumë se tetëmbëdhjetë muaj, duke pasur në shënjestër entitete biznesi anembanë globit përmes një skeme të mirëmenduar. Të pandehurit përdornin teknologjinë e avancuar për të imituar tiparet pamore dhe vokale të ekzekutivëve të lartë, përmes të cilave kontaktonin stafin e sektorëve të financave për të urdhëruar derdhje të konsiderueshme monetare. Pasi krijonin një imazh të rremë besueshmërie në rrugë digjitale, autorët e dyshuar zhvillonin gjithashtu thirrje audio dhe vizuale, duke u hequr si krerë të ndërmarrjeve apo këshilltarë ligjorë. Në disa raste të veçanta, ata shfrytëzonin emrat e studiove të njohura të avokatisë, duke i manipuluar punonjësit se transaksionet ishin të fshehta, urgjente dhe plotësisht të ligjshme. Shumat e grabitura kalonin përmes qarkullimit në llogari të ndryshme bankare ndërkombëtare dhe më vonë shndërroheshin në monedha digjitale (kriptovaluta), me qëllim humbjen e gjurmëve të origjinës. Lista e viktimave të kësaj goditjeje përfshin qendra mjekësore në Misuri dhe Kaliforni, një institucion bankar në Rhode Island, një firmë britanike të teknologjisë financiare, një fond investimesh në Massachusetts, si dhe një ndërmarrje të ushqimit për kafshë shtëpiake në Florida. Arrestimi i tre të dyshuarve është kryer gradualisht gjatë muajve qershor dhe shtator. Ata përballen me akuza formale për mashtrim përmes mjeteve elektronike, përvetësim të identitetit dhe pastrim të produkteve të veprës penale. Në rast se gjykata i shpall fajtorë për akuzat që rëndojnë mbi ta, ata rrezikojnë dënime deri në 20 vite heqje lirie për secilën prej veprave më të rënda penale. Ky rast shërben si një sinjal i fortë alarmi për mënyrën se aftsitë e inteligjencës artificiale po keqpërdoren nga grupet kriminale për të kryer mashtrime të përmasave të larta, duke sfiduar aftësinë njerëzore për të dalluar mes të vërtetës dhe falsifikimit digjital.