Reforma në drejtësi, Gogu diskuton me komisionerin McGrath planet e integrimit

Ministri i Drejtësisë, Toni Gogu, ka zhvilluar një takim të rëndësishëm me Komisionerin Evropian për Demokracinë, Drejtësinë, Shtetin e së Drejtës dhe Mbrojtjen e Konsumatorit, Michael McGrath, në kuadër të zhvillimeve të Forumit Ministror BE–Ballkani Perëndimor. Përmes një komunikimi në rrjetet sociale, ministri Gogu ka ndarë detajet e këtij takimi, duke bërë me dije se në qendër të bisedimeve ka qenë analiza e Raportit të Progresit dhe përkushtimi i pakushtëzuar i institucioneve shqiptare për të zbatuar çdo sugjerim të ardhur nga Brukseli. “Raporti i Progresit nuk është vetëm një vlerësim i punës së bërë, por edhe një udhërrëfyes për atë që na mbetet për të realizuar”, ka shprehur ai në mesazhin e tij. Më tej, Gogu ka vënë inkonjicion gatishmërinë e ekzekutivit për ta përkthyer çdo gjetje dhe rekomandim të Komisionit Evropian në hapa konkretë pune, duke i dhënë një rëndësi të veçantë Kapitullit 23 që përfshin sistemin e drejtësisë dhe të drejtat themelore. “Kapitulli 23, që lidhet me gjyqësorin dhe të drejtat themelore, do të jetë ndër kapitujt e fundit që do të mbyllen. Prandaj, çdo detyrë kërkon vëmendje, përgjegjësi dhe bashkëpunim të ngushtë me partnerët tanë evropianë”, ka shtuar më tej ai. Në përmbyllje të reagimit të tij, ministri ka theksuar se arritjet e deritanishme shërbejnë si një shtysë e fuqishme motivimi, megjithatë sfidat dhe detyrimet e ardhshme kërkojnë një angazhim edhe më të madh operacional.