Vendimi i FIFA-s për Argjentinën: Zbutet dënimi i Molinës, konfirmohet pezullimi i rëndë i Paredes

Shtëpia e futbollit botëror, FIFA, ka marrë një vendim të pjesshëm në favor të Federatës së Futbollit të Argjentinës (AFA), duke pranuar pjesërisht ankesën e paraqitur lidhur me masat disiplinore të paspërballjes finale të Kupës së Botës 2026 ndaj Spanjës. Si rezultat, dënimi i mbrojtësit Nahuel Molina është reduktuar ndjeshëm nga shtatë në katër ndeshje pezullim, ndërsa sanksioni prej 10 ndeshjesh për mesfushorin Leandro Paredes ka mbetur i pandryshuar. Krahas uljes së ndeshjeve, organi më i lartë drejtues i futbollit ka vendosur që edhe gjysma financiare e dënimit për Molinën të lehtësohet, duke e zvogëluar gjobën nga 90,000 në 60,000 dollarë. Megjithatë, situata paraqitet ndryshe për Paredes, i cili do të detyrohet të shlyejë plotësisht pezullimin e tij prej 10 takimesh, si dhe të paguajë gjobën fillestare prej 90,000 dollarësh, konfirmim ky i bërë i ditur përmes një njoftimi zyrtar nga vetë AFA. Kujtojmë se Paredes u ndëshkua rëndë me 10 ndeshje pas sjelljes agresive ndaj Gavit gjatë finales së muajit korrik, ku Spanja triumfoi minimalisht 1-0 ndaj Argjentinës. Nga ana tjetër, Molina u vu në shënjestër të disiplinës për shkak të tensioneve dhe incidenteve të regjistruara menjëherë pas përfundimit të sfidës. Në reagimin e saj zyrtare, AFA ka bërë të ditur se do të kërkojë dokumentacionin e plotë dhe arsyetimin ligjor të vendimeve të marra nga FIFA, përpara se të ndërmarrë hapin e radhës për ta dërguar çështjen në Gjykatën e Arbitrazhit Sportiv (CAS). Krerët e federatës argjentinase shprehen të bindur se zotërojnë baza të forta juridike dhe faktike për të kërkuar një rishikim të plotë dhe lehtësim të mëtutjeshëm të masave ndëshkimore. Pakoja fillestare e sanksioneve disiplinore përfshinte gjithashtu një ndeshje pezullimi për Thiago Almadën, si dhe tri ndeshje jashtë fushës për anëtarin e stafit teknik të Argjentinës, Roberto Ayala. Ndërkohë, AFA u ndëshkua edhe me një gjobë të kripur prej 321,000 dollarësh, si dhe u urdhërua të zhvillojë ndeshje me kapacitet të kufizuar të spektatorëve, si pasojë e incidenteve dhe thirrjeve diskriminuese të evidentuara gjatë përballjeve të Argjentinës kundër Kepit të Gjelbër, Egjiptit, Zvicrës, Anglisë dhe Spanjës.