Kryeministri Kurti pret albanologun Zymer Ujkan Neziri: Vlerësim i veçantë për 80-vjetorin e lindjes

Kryeministri i Republikës së Kosovës, Albin Kurti, ka mirëpritur në zyrat e ekzekutivit albanologun dhe hulumtuesin e shquar të eposit tonë kombëtar, prof. dr. Zymer Ujkan Neziri, me rastin e shënimit të 80-vjetorit të tij të lindjes. Përmes një njoftimi zyrtar, kreu i qeverisë bëri të ditur se në këtë takim jubilant, krahas profesor Nezirit, morën pjesë edhe studiuesja prof. dr. Ina Arapi, studiuesi nga Universiteti i Vjenës, prof. dr. Ardian Ahmedaja, albanologu arbëresh prof. dr. Nicola Scaldaferri nga Universiteti i Milanos, si dhe e bija e akademikut, Shqipe Neziri Vela. Gjatë bisedës, shefi i ekzekutivit u ndal te angazhimi disa dekadash i Nezirit në fushën e vjeljes, arkivimit dhe analizës shkencore të folklorit gojor shqiptar, duke vënë në pah peshën e veçantë që ka ky angazhim për mbrojtjen dhe gjallërimin e këngëve kreshnike. Sipas shefit të qeverisë, ndër vite, albanologu ka regjistruar folklor në terren drejtpërdrejt nga lahutarët tanë, krahas hulumtimeve shkencore të kryera në institucione prestigjioze ndërkombëtare, siç janë arkivat e Universitetit të Vjenës dhe atij të Harvardit. “Falë kësaj pune të përkushtuar, trashëgimia jonë kulturore është pasuruar me një korpus prej më shumë se 100 mijë vargjesh të këngëve kreshnike, të botuara në 15 vëllime, një pasuri e jashtëzakonshme për kulturën, kujtesën historike dhe studimet shqiptare”, ka shkruar Kurti. Në vijim, kreu i qeverisë shprehu falënderimin dhe konsideratën e lartë për angazhimin jetësor të studiuesit, duke e cilësuar atë si gurthemel në mbrojtjen e pasurisë shpirtërore të kombit. Në mbyllje të këtij takimi festiv, Kurti i përcjelli profesor Nezirit urimet më të sinqerta për shëndet të plotë, jetë të gjatë dhe suksese të reja në angazhimet e tij kërkimore e kulturore.