Bushi paralajmëron betejë në “Air Albania”: Do të japim shpirtin në fushë, ndaj Spanjës nuk pranojmë humbjen

Kombëtarja U-21 e Shqipërisë po bëhet gati për dy sfidat e radhës miqësore në muajin nëntor, ku do të matë forcat me Luksemburgun dhe Spanjën në datat 13 dhe 17. Në prag të këtyre përballjeve, trajner Alban Bushi ka dalë në një konferencë për shtyp për të bërë publike listën e futbollistëve të grumbulluar dhe për të ndarë pritshmëritë e tij. “Kemi përpara dy teste mjaft të rëndësishme dhe të vështira. Luksemburgu ka treguar rritje të ndjeshme vitet e fundit dhe na ka mposhtur 1-0, ndaj kjo është një mundësi e artë për revansh, sidomos duke luajtur para tifozëve tanë pas një mungese gati njëvjeçare. Plani ynë është që këto sfida, përfshirë edhe ato të muajit mars, t'i zhvillojmë në ‘Air Albania’, për t'u akomoduar sa më mirë me ambientin dhe fushën. Pavarësisht mungesave të dëmtuarve Fikaj dhe Burak Alili, të cilët kanë qenë shtylla të formacionit, kemi afruar lojtarë cilësorë si Sina e Fetaj që vijnë nga Kombëtarja A, ndërsa shpresojmë t'i kemi gati për takimin në Hungari më 15 nëntor,” u shpreh teknikhu kuqezi. Përballja e dytë ndaj Spanjës do të vërë në provë të vërtetë potencialin e kuqezinjve, por Bushi mbetet i bindur se skuadra e tij do të sakrifikojë çdo gjë në fushë për të arritur një rezultat pozitiv ndaj një prej kombëtareve më të forta në nivelin e grupmoshave. “Spanja përbën një rast të veçantë dhe radhitet mes më të mirëve në botë për U-21. Janë teknikë, zotërojnë sferën dhe nuk të lënë hapësira. Megjithatë, ne kemi qasjen dhe identitetin tonë. Nuk frikësohemi aspak; do të luftojmë deri në frymën e fundit dhe nuk do të dorëzohemi lehtë. Në Europian do të përballemi me gjigantë si Franca, Belgjika apo Kroacia, dhe prej kohësh po punojmë me një strategji të mirëmenduar për këtë standard. Paraqitjet tona ndaj Ukrainës ku barazuam 2-2, si dhe ndeshjet ndaj Italisë e Sllovenisë, dëshmojnë se jemi të rrezikshëm. Ndeshja me spanjollët do të jetë spektakolare dhe do të japim gjithçka, madje edhe jetën, vetëm për të shmangur humbjen,” theksoi ai. Në mbyllje të fjalës së tij, trajneri Bushi i bëri thirrje publikut shqiptar që të mbushë shkallët e stadiumit “Air Albania”, duke kërkuar mbështetje masive jo vetëm për supersfidën ndaj spanjollëve, por edhe përballë Luksemburgut.