Vërmicë: Kapen rreth 10 tonë mallra të padeklaruara në një kamion, vlera kap shifrën e 154 mijë dollarëve

Autoritetet e Doganës së Kosovës kanë parandaluar një rast të kontrabandës, pasi kanë zbuluar rreth 10 tonë mallra të padeklaruara brenda një kamioni në pikën kalimit kufitar të Vërmicës. Sipas njoftimit zyrtar, mjeti transportues kishte kryer më parë procedurat përmes deklaratës së pararritjes, mirëpo gjatë analizës së riskut, ai është veçuar nga zyrtarët për një kontroll më të detajuar. Nëpërmjet përdorimit të skanerit dhe procedurës së matjes së peshës, u konstatua një mospërputhje e qartë mes dokumentacionit dhe ngarkesës faktike, duke nxjerrë në pah një sprekje prej afërsisht 10 tonësh mallra që nuk ishin deklaruar fare. Sipas përllogaritjeve paraprake, vlera e kësaj sasie mallrash, pa llogaritur taksat dhe detyrimet e importit, kap shifrën e afërsisht 154 mijë dollarëve amerikanë. Ndërkaq, lidhur me këtë ngjarje, autoritetet kompetente kanë nisur procedurat administrative, të cilat po zhvillohen konform dispozitave ligjore të parashikuara në Kodin e Doganave dhe Akcizave.